Qurbon Tursunov "Iymonaxon Nozima" korxonasi faoliyati bilan tanishdi
2025-11-13 17:20:00 / Yangiliklar
Bugun shahar hokimi "Mahmud Tarobiy" mahalla fuqarolar yig‘ini hududidagi "O‘tror" kichik sanoat zonasida joylashgan “Iymonaxon Nozima” MCHJ faoliyati bilan tanishdi.
Mazkur korxona 2019-yilda tashkil etilgan bo‘lib, tashabbuskor tadbirkor Kamol Fazilov boshqaradi. “Iymonaxon Nozima” MCHJ sut mahsulotlarini qayta ishlashga ixtisoslashgan bo‘lib, asosan qaymoq, smetana, kefir kabi mahsulotlarni ishlab chiqaradi. Asosan Buxoro bozorlari va do'konlariga tayyor mahsulot yetkazib beradi.
Hozirgi kunda korxonada 8 nafar ishchi xodim faoliyat yuritmoqda. 2025-yilning o'tgan davri mobaynida jamiyat tomonidan 435 million so‘mlik sanoat mahsulotlari ishlab chiqarilgan.
Qurbon Tursunov korxona rahbari bilan suhbatlashib, ishlab chiqarish hajmini kengaytirish, yangi ish o‘rinlarini yaratish va mahsulot turlarini ko‘paytirish borasida o‘z taklif va tavsiyalarini berdi.