Buxoro viloyati hokimligi

Tahlillardan koʻrinishicha, 2024-yilda 309 ming 405 nafar aholi bandligini taʼminlash maqsad qilingan boʻlib, amalda 384 ming 949 nafar aholi bandligi taʼminlangan. Kambagʻal oilalarning yashash sharoitlarini yaxshilash va daromadlarini oshirish maqsadida viloyatda jami 7 ming 585 ta oila saralangan boʻlib, ularni moddiy qoʻllab-quvvatlashga doir zarur chora-tadbir qoʻllanmoqda.  

Jumladan, 12,9 ming nafar fuqaroga imtiyozli kredit, 2,5 ming nafariga subsidiya ajratilgan, 17,5 ming nafari doimiy va mavsumiy ish oʻrinlariga ishga joylashtirilgan, 4,2 ming nafari kasb-hunar va tadbirkorlikka oʻqitish orqali bandligi taʼminlangan. Xuddi shunday, 282 nafarining tomorqalardan samarali foydalanishini yoʻlga qoʻyish orqali daromad manbai taʼminlangan. 

Bu saʼy-harakat joriy yilda ham davom ettirilib, viloyatda aholi bandligini taʼminlash, qoʻshimcha daromad manbalarini topish, yangi imkoniyatlarni ishga solib, doimiy ish oʻrinlarini koʻpaytirish maqsadida zarur choralar koʻrilayotgani barobarida ixcham issiqxonalarni koʻpaytirishga alohida eʼtibor qaratilmoqda.

Hozirda Vobkent tumanida ham turmush tarzi ogʻir kechayotgan, kambagʻal va daromadsiz qolgan oilalarga oʻzlarini tiklab olishlari uchun issiqxona qurib berish, bu borada  yoqilgʻisiz isitiladigan, ixcham issiqxonalarni barpo qilish tajribasi ommalashmoqda. Hududdagi mahalla va qishloqlarda 1 sotixdan iborat yer maydonni egallaydigan jami 257 ta ixcham issiqxona qurish ishlariga jadal kirishilgan.

Aholi tomorqasi va ijaraga ajratilgan yer maydonlaridan samarali foydalanishni tashkil etish uchun instrumentlar, “Sayxunobod” tajribasi boʻyicha aholi tomorqalari mahsuldorligini oshirishda mahalla bankirlari va yordamchi-agentlarning ishtiroki, tomorqalarni suv bilan taʼminlash, tomchilatib sugʻorish tizimi orqali ekinlar yetishtirishni yoʻlga qoʻyishning afzalliklari, sabzavot, poliz mahsulotlari yetishtirishdan tomorqalarda 2-3-marta hosil olish boʻyicha agrotexnik tajribani ommalashtirish talabi qoʻyilmoqda. 

Shuningdek, Prezidentimiz tomonidan ilgari surilgan yangi tizim “Bir mahalla—bir mahsulot” tamoyilini joriy etish, shu orqali tomorqadan yanada samarali foydalanish, aholi daromadini oshirishga eʼtibor qaratilmoqda. Tuman miqyosida olsak, hozirda moddiy qiyinchilikda qolgan oilalarga imtiyozli tartibda qurib berilayotgan ixcham issiqxonalar tufayli tumandagi issiqxona maydoni yana qariyb 3 gektarga kengaymoqda. 

Viloyat hokimligi matbuot xizmati