Buxoro viloyati hokimligi

Kogon tumanining “Niyozhoji” MFY da yashovchi mahalla oqsoqollaridan biri Baxshillo Qoʻchqorov xonadoni ham ana shunday mehnatkash, bor imkoniyatdan unumli  foydalanayotgan oilalar sirasidan. Ayni kunda Baxshillo ota xonadonidagi 2  sotixli ixcham issiqxonadan yilning toʻrt faslida peshma-pesh hosil yetishtirilayotgani fikrimiz dalili.  

—Yaqinda 400 kilogram atrofidagi kartoshkani kovlab olib, hosildan boʻshagan yerga  koʻkat va rediska ekdik,—deydi Qoʻchqorovlar xonadoni sohibi.—Mehnatimizga yarasha kartoshkadan 2 million soʻmdan ziyod daromad qilgan boʻlsak, nasib qilsa, rezavorlardan ham shuncha foydani koʻzlab turibmiz. 

Baxshillo ota farzandlariga ham ekin yeri sir-sinoati, daromad manbai ekanini yoshligidan uqtirgani shundoqqina koʻzga tashlanadi. Masalan, u kishining toʻngʻich oʻgʻli issiqxonada tomchilatib sugʻorish texnologiyasi asosida “son xyan” naviga mansub qulupnay hosilidan yetishtirib, yaxshigina daromadga erishmoqda. Aytish joizki, ayni kunda atigi 2 sotixdan iborat issiqxona bir oilaning moddiy ehtiyojlarini bartaraf etishga xizmat qilmoqda. 

Umuman, keyingi oylarda Kogon tumanida aholi tomorqachilari soni 21 mingtaga yaqin boʻlib, ular tasarrufidagi mavjud tomorqa yeri 2 ming 128 gektarga yetkazilgan. Shu kunlarda qish qahratonida ham ularda mehnatkashlar qoʻli bilan plyonka ostidagi haroratni moʻtadil saqlab, sarxil noz-neʼmat, tabiat saxovati boʻlmish sabzavot-poliz mahsulotlari yetishtirilmoqda. Hududda bevosita issiqxona xoʻjaligini barpo etib, unda yilning toʻrt faslida barakali hosil yetishtirayotgan xoʻjaliklar ekin yeri 20 gektardan ortiq maydonni tashkil etmoqda. 

Mazkur issiqxonalarning aksariyati 1–5 sotixdan iborat boʻlib, yil boʻyi asosan pomidor, kartoshka, piyoz, bodring, bulgʻor qalampiri, karam, sarimsoqpiyoz, qolaversa, limon, apelsin kabi sitrus meva yetishtirilib, xalqimiz dasturxoniga tuhfa etib kelinmoqda.

Viloyat hokimligi matbuot xizmati