Buxoro viloyati hokimligi

Shunday tinib-tinchimas dehqon mirishkorlardan biri Bahouddin Naqshband mahallasida yashovchi Nuriddin Teshayevdir. Ayni kunda bu xonadon hovlisidagi 10 sotixdan iborat ekin yeri issiqxonaga aylantirilgan boʻlib, keyitngi yillarda unda peshma-pesh sabzavot mahsulotlari, rezavorlar ekib yetishtirib kelinmoqda. 

— Halol-pok ishlaganni yer quruq qoʻymas ekan,—deydi tomorqa egasi Nuriddin Teshayev.—Shu ekin yer maydonidan oʻtgan 2024-yilgi dehqonchilik mavsumida 3,5 tonnaga yetkazib kartoshka mahsulotini yetishtirgan boʻlsak, bundan dik. Birgina kartoshkani oʻzidan qariyb 30 million soʻm daromad oldik. Hosildan boʻshatilgan yerda baqlajon ekib, hademay bu hosilniyam saranjomlab, 10 million soʻm atrofida daromadga erishish harakatidamiz. Muhimi, oilamiz bilan tomorqa mehnatiga oʻrganganmiz.    

Tinib-tinchimagan Nuriddin Teshayev issiqxonasidagi dehqonchiligi bilan cheklanib qolmagan. U oʻz xonadonida daromadbop qoʻziqorin yetishtirishga qiziqib, buni amalda sinab koʻrmoqda. Buning uchun mahalladagi hokim yordamchisi tavsiyanomasi asosida 29 million soʻm imtiyozli kredit mablagʻini olib, "Har bir oila—tadbirkor" dasturi dorasida ish boshladi. Qoʻziqorinning serhosil “Vishenka” navidan yetishtirishga jiddiy kirishgan. Uning aytishicha, bu yoʻnalishda hosil 40 kunda tayyor boʻladi, mehnati ogʻir emas shuningdek xaridorbop. 

Chigit qipigʻi toʻldirilgan qopchalarga ekilgan qoʻziqorin urugʻini agrotexnik tartibida undirib, parvarishlansa, bir oyda 300 kilogramgacha hosil olinishi tajribada sinovdan oʻtgan. Mehnatkash oila shu kunlarda qoʻziqorinning bozordagi   narxi 35-40 ming soʻm atrofida ekanini chamalab, hademay, bundan 10 million soʻmdan oshiq daromad olish ilinjida. 

Shu oʻrinda aytish joizki, temiryoʻlchilar tumanida bevosita issiqxona xoʻjaligini barpo etib, unda yilning toʻrt faslida ham barakali hosil yetishtirayotgan xoʻjaliklar ekin yeri 20 gektardan ortiq maydonni tashkil etmoqda. Uy xoʻjaligini obod qilib, ekin yeridan katta daromad olayotgan kogonlik ilgʻor tomorqa egalaridan Sorgʻun mahallasida istiqomat qilayotgan Shuhrat Toʻrayev, Oʻba-Choʻli mahallasida yashovchi Nosir Haydarov, Bahouddin Naqshband mahallasida yashovchi Bahrom Yodgorov, Sarayon mahallasida yashovchi Said Narziyev, Tutkunda mahallasida istiqomat qilayotgan Axtam Fozilovlarni alohida koʻrsatish mumkin.

Yil boʻyi astoydil ekin yerida ishlab, kerak boʻlsa “yoʻqni yoʻndirib”, pirovardida peshona teri evaziga barakali hosil yetishtirayotgan aholi xonadonlari mirishkorlari bular. Mazkur xoʻjaliklarda joriy yil qish oylaridan plyonka ostida kartoshka, pomidor, piyoz, bulgʻor qalampiri, yana boshqa mahsulotlar yetishtirilayotganini koʻrish mumkin. Ular orasida limon, apelsin, mandarin kabi  sitrus meva yetishtirishda puxta tajribaga egalari bor.

Viloyat hokimligi matbuot xizmati