Turkiya bilan qurilish va muhandislik sohalarida hamkorlik masalalari muhokama qilindi
2025-02-21 20:25:00 / Yangiliklar
19-20-fevral kunlari Samarqand shahrida “Turkiy dunyo muhandislar va arxitektorlar ittifoqi” tomonidan oʻtkazilgan “Turkiy dunyo shaharsozlik qurultoyi” qatnashchilari bugun Buxoroda boʻlishdi.
Delegatsiya dastlab Buxoroning diqqatga sazovaor joylari bilan yaqindan tanishtirildi. Shuningdek, “Turkiy dunyo muhandislar va arxitektorlar ittifoqi” aʼzolari hududda amalga oshirilgan qurilish-bunyodkorlik ishlarini koʻzdan kechirishdi.
Buxoro viloyati hokimi Botir Zaripov ishtirokida tashkil etilgan uchrashuvda Turkiyaning salohiyatli kompaniyalari va tegishli davlat tashkilotlari oʻrtasida shaharsozlik sohasida oʻzaro hamkorlik aloqalarini rivojlantirish masalalari koʻrib chiqildi.
Viloyat rahbari mehmonlarga Buxoroning qadim tarixi, hozirda amalga oshirilayotgan ishlar, istiqbolli loyihalar haqida maʼlumot berdi.
Turkiyaning qurilish sohasidagi salohiyatini yuqori baholab, bu borada yaqin hamkorlik qilishdan mamnunligini qayd etdi.
Oʻz navbatida “Turkiy dunyo muhandislar va arxitektorlar ittifoqi” vakillari samimiy qabul uchun oʻz minnatdorliklarini bildirib, Buxorodan olgan iliq taassurotlari bilan oʻrtoqlashishdi.
Muloqotda Buxoroda kelgusida amalga oshirilishi koʻzda tutilgan yirik bunyodkorlik loyihalari taqdimot qilindi. Turk ishbilarmonlari taqdim etilgan loyihalarni yuqori baholagan holda ularni muvaffaqiyatli amalga oshirishda har tomonlama qoʻllab-quvvatlashga tayyor ekanliklarini bildirishdi.
Har bir loyiha boʻyicha hamkorlikda ish tashkil etishga kelishib olindi.
Maʼlumot uchun: “Turkiy dunyo muhandislar va arxitektorlar ittifoqi” 2022-yilda Anqarada nodavlat-notijorat tashkilot sifatida taʼsis etilgan. Uning asosiy maqsadi –“Tilda, fikrda va ishda birlik” shiori asosida turkiy dunyodagi tarixiy merosni qayta tiklashga resurslar jalb qilish. Ittifoqning asosiy hamkorlari turkiy davlatlar tashkilotlari hisoblanadi.
Viloyat hokimligi matbuot xizmati