Shofirkon tumani markazidan 110 kilometr uzoqlikda, Qizilqum kengliklari bagʻridagi Churuq ovulida bugunga kelib qozoq millatiga mansub 42 ta xonadon va jami 270 nafarga yaqin aholi istiqomat qilmoqda.

Chorvachilik va qisman dehqonchilik tirikchilik manbai boʻlgan ovulda oʻtgan asr yetmishinchi yillarida yogʻoch–taxtadan barpo qilingan, keyingi oylarda yangi va zamonaviy taʼlim dargohi loyihasi ishlab chiqilgan 39-sonli umumtaʼlim maktabi deyarli qirq nafar oʻquvchini oʻz bagʻriga olgan boʻlsa, 2016-yilda qoʻshimcha 30 oʻrinli oʻquv korpusi qurib foydalanishga topshirilgan. Sharof Rashidov nomidagi MFY ning Dehqonobod filialida qurib ishga tushirilgan 23-sonli bolalar bogʻchasi 90 nafar jajji oʻgʻil-qizga moʻljallangan. Tuman tibbiyot birlashmasining Churuq salomatlik punkti esa choʻlquvarlar salomatligini saqlashda kamarbasta.

Yangi yil bayrami arafasida tuman hokimligi mutasaddilari har yilgi odatga koʻra Churuq ovulida boʻlishib, ovulliklar quvonchiga sherik boʻldilar. Ovul markazida bayramona bezatilgan archa atrofida 50 nafarga yaqin jajji oʻgʻil-qizga bayram sovgʻalari berilgani ularni xushnud qilib, ularning ota-onalarini ham quvontirdi. 

Shu kungi tadbirda ovulliklarning bayramni koʻngildagidek oʻtkazishlari uchun qishloq xoʻjaligi mahsulotlari, arzonlashtirilgan oziq-ovqat mahsulotlari yarmarkasi tashkil etildi. Yarmarka aholining kundalik ehtiyojlari uchun zarur boʻlgan asosiy mahsulotlarni qulay narxlarda sotib olish imkonini berdi. Shu bilan birga, ovulda yashovchilar ijtimoiy muhofazasi, qishki mavsumni risoladagidek oʻtkazishga doir zarur chora-tadbirlar belgilandi. Bu nafaqat bayram kayfiyatini, balki aholining turmush sifatini yaxshilashga xizmat qiladi. 

Viloyat hokimligi matbuot xizmati