Buxoro viloyati hokimligi

Viloyatimizda ijtimoiy muhofazaga muhtoj voyaga yetmaganlar bilan bogʻliq tahlilardan koʻrinishicha, ayni kunda nogironligi boʻlgan bolalarning 2 033 nafari umumtaʼlim maktablariga, 1 071 nafari maxsus internatlarga, 74 nafari inklyuziv hamda 631 nafari uyda taʼlimga jalb qilingan. Xuddi shunday, jismoniy imkoniyati cheklangan 498 nafar bola bilan induvidial ishlarni tashkil qilishga doir taʼlimga  qamrab olish choralari koʻrilmoqda. 

Bu borada Buxoro shahridagi “Muruvvat” bolalar internat uyi faoliyati misolida olsak, joriy yil muassasada 266 nafar bola tarbiyalanib kelinmoqda. Muassasada “kunduzgi parvarishlash” xizmati tashkil etilib, 26 nafar bola, 2 ta maxsus maktab internatida esa 15 nafar bola “gʻamxoʻrlik guruhlari”ga jalb qilinmoqda. Kelgusi yili mazkur guruhlarni kengaytirish choralari koʻrilmoqda.  

Taassufki, bugun viloyatda 693 ming nafardan ortiq voyaga yetmagan oʻgʻil-qizdan 327 nafari yetim va ota-ona qaramogʻidan mahrum boʻlganlardir. Ularning 5 311 nafari vasiylik (homiylik)ka olingan boʻlib, 2 184 nafari toʻliq boʻlmagan oilalarda yashovchi bolalar hisoblanadi. Shunga qaramasdan, bugun bor kuch va imkoniyat nogironligi boʻlgan, jismoniy imkoniyati cheklangan bolalarni taʼlim olishlarini taʼminlashga qaratilmoqda.  

Ayni kunda bu muassasada ota-ona qaramogʻidan mahrum boʻlgan voyaga yetmagan bolalarning 73 nafari vasiylikka, 28 nafari homiylikka, 67 nafari potranatga berilgan boʻlib, 18 nafari oilaviy bolalar uyiga joylashtirilgan. Oʻrni kelganda, aytish joizki, hozirda 6 ta oilaviy bolalar uylarida tarbiyalanayotgan 18 nafar yetim va ota-ona qaramogʻidan mahrum boʻlgan oʻgʻil-qizga har oyda byudjetdan qiymati 62 million soʻm, bir yilda esa 744 million soʻm mablagʻ ajratilib kelinmoqda. Nogironligi boʻlgan voyaga yetmaganlarning taʼlim-tarbiyasiga boʻlgan eʼtibor va ragʻbatlantirishlar tufayli joriy 2024-2025-oʻquv yilida viloyatda oʻndan ortiq yetim va ota-ona qaramogʻidan mahrum boʻlgan bolalar imtiyozli ravishda oliy taʼlimga oʻqishga qabul qilingani quvonarli, albatta. 

Bundan tashqari, joylarda olib borilgan oʻrganishlar natijasida “Mehr daftari”ga kiritilgan yetim bolalar va ota-ona qaramogʻidan mahrum boʻlgan oʻgʻil-qizlarni qoʻllab-quvvatlash jamgʻarmasi hisobidan joriy yilda 263 nafar bolaga umumiy qiymati 4 milliard 700 million soʻmga teng mablagʻ yoʻnaltirilmoqda.