Ushbu savdo yarmarkalarida kundalik zaruriy oziq-ovqat mahsulotlari aholiga maqbul narxlarda sotuvga qoʻyilgan. Rastalar har kuni yangi va sifatli qishloq xoʻjaligi mahsulotlari, salqin ichimliklar, goʻsht, yogʻ, guruch, umuman olganda, bayram dasturxoni uchun eng kerakli noz-neʼmatlar bilan toʻldirilmoqda. Bu vaziyat taqozosiga koʻra, bayram dasturxoni xaridini hafta-oʻn kun oldin badastir qiladigan yurtdoshlarimiz uchun yana bir qulaylik. Albatta, bunda narx-navoning hamyonbop boʻlishi ayni muddao. 

Ayni kunda chekka tumanda “Qorakoʻl dehqon bozori” MCHJ tomonidan aholi turmush farovonligi, dasturxoni toʻkinligini taʼminlash, bayramni yuqori kayfiyatda nishonlanishini taʼminlash uchun zarur shart-sharoit hozirlanmoqda.  Xususan, tumanning barcha 50 ta mahalla fuqarolar yigʻinida arzonlashtirilgan savdo yarmarkalari tashkil etilmoqda.  

— Shu kungacha hududdagi 29 ta mahallada jami 77 marotaba arzonlashtirilgan narxdagi savdo yarmarkalari oʻtkazilib, ularda hozirgacha 90 tonnadan oshiq oziq-ovqat mahsuloti sotilgan boʻlib, shundan qariyb 30 tonna kartoshka, 13 tonna piyoz, 10 tonna sabzi, 11 tonna guruch, 8,5 tonna goʻsht, 6 tonna parranda goʻshti, 15 tonna miqdorida un, qolaversa, 5,3 tonna oʻsimlik yogʻi arzonlashtirilgan narxlarda aholiga taqdim qilingan, – deydi tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Sanjar Husenov. — Bundan tashqari, qish-bahor mavsumida aholining sabzavot-poliz va boshqa qishloq xoʻjaligi mahsulotlariga boʻlgan ehtiyojini taʼminlash, bozorda narx-navoning barqaror boʻlishi uchun  tumanda zarur oziq-ovqat zaxirasi yaratilgan. 

Bu borada birgina “Qorakoʻl dehqon bozori” MCHJ ni olsak, mavsum boshidan buyon jami 2 145 tonna maxsulot zahira qilingan boʻlib, shundan 650 tonna kartoshka, 535  tonna piyoz, 210 tonna paxta va oʻsimlik yogʻi hamda 750 tonna guruch mahsuloti jamgʻarilgan. 

Qayd etish joizki, arzonlashtirilgan yarmarkalarda qadoqlangan paxta yogʻi 14000  soʻm, oʻsimlik yogʻi 16000 soʻm, kartoshka 4000 soʻm, tuxum 1000 soʻm, piyoz va sabzi 2000 soʻmdan sotilmoqda. Aholiga qulaylik yaratish maqsadida tashkil etilayotgan bunday  arzonlashtirilgan yarmarkalarda dehqon, fermer xoʻjaliklari, dala maydonlarida yetishtirilgan sifatli qishloq xoʻjaligi va oziq-ovqat mahsulotlari arzon narxlarda xaridorlarga taqdim etilmoqda.

Viloyat hokimligi matbuot xizmati