Qorovulbozor: “Tinchlik” MFY da sug‘orish tizimlari tortilmoqda
2024-11-28 11:15:00 / Yangiliklar
Bu jarayonda “Neftchi” va Qorovulbozor davlat o‘rmon xo‘jaliklari tomonidan turli manzarali daraxt va buta nihollari peshma-pesh yetkazib berilmoqda.
O‘zbekiston Respublikasi Prezidentining 2021-yil 30-dekabrida “Respublikada ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida”gi PF-46-sonli farmoni qabul qilingan. Mazkur farmon ijrosini ta’minlash maqsadida “Tinchlik” MFY ning Bobur ko‘chasida 1 kilometr masofadagi beton ariq tortilmoqda.
Cho‘lquvarlar tumani markazida jami 73 ta ko‘p qavatli uy bo‘lib, ularda 4 mingdan ortiq aholi istiqomat qilmoqda. Shu ko‘p qavatli turar joylarning 51 tasi "Tinchlik" mahallasida joylashgan bo‘lib, mazkur aholi yashash uylarini qishgi mavsumga tayyorlash maqsadida turar joylar tom qismlari joriy ta’mirdan chiqarilayotgani barobarida ko‘p qavatli uylarga tutash hududlardagi yerlar tartibga keltirilib, ayni kunda mevali va manzarali daraxt ko‘chatlarini o‘tqazishga e’tibor kuchaytirilgan. Mahallalar faollari, aholi vakillari bajonidil daraxt niholini o‘tqazib, chor-atrof yashilligiga o‘ziga xos hissa qo‘shishmoqda.
Shu kungacha bu borada “obi hayot”ni turli manbalardan tashib keltirib yoki yerosti artezian suvlaridan foydalanib kelingan. Nihoyat, cho‘lquvarlar zaminida xayrli tashabbusga qo‘l urilib, o‘tgan oydan Imom Buxoriy mahallasining Mustaqillik hamda Cho‘lquvar mahallasining Temir yo‘l, Geologlar va Baxt ko‘chalariga oqar suv yetib keldi.
Ayni kunda Tinchlik mahallasida tortilayotgan sug‘orish tarmoqlarining qurilish ishlari “G’ijduvon Perfect Conctruction” MCHJ tomonidan olib borilmoqda. Xayrli tashabbus natijasida Bobur” ko‘chasidagi 220 ta xonadon hamda ko‘p qavatli uylarning ko‘kalamzorlashtirilayotgan qismlari to‘liq ariq suvi bilan ta’minlandi.
Muhimi, oqar suv endilikda bu hududda ham ko‘rkam bog‘lar barpo etilishiga dalolatdir. Qolaversa, aholi xonadonlaridagi ekin yerlarida sabzavot-poliz mahsulotlari yetishtirilib, dasturxon to‘kinligiga xizmat qiladi.
Viloyat hokimligi matbuot xizmati