Sirdaryo viloyati Boyovut tumani hokimligi

Boyovut tumani hokimligida korrupsiyaga qarshi kurashish, davlat xizmatida ochiqlik va shaffoflikni ta’minlash masalalariga bag‘ishlangan uchrashuv bo‘lib o‘tdi.

Unda tuman hokimining o‘rinbosari, Boyovut tumani prokurori hamda hokimlik apparati xodimlari, davlat tashkilotlari va muassasalari rahbarlari ishtirok etdi.

Uchrashuv davomida korrupsiyaning jamiyat taraqqiyoti, iqtisodiyot rivoji hamda davlat boshqaruvi samaradorligiga salbiy ta’siri, ushbu illatning oldini olish bo‘yicha amalga oshirilayotgan islohotlar haqida atroflicha so‘z yuritildi.

So‘zga chiqqanlar korrupsiyaga qarshi kurashish har bir davlat xizmatchisining ustuvor vazifasi ekanini ta’kidlab, qonuniylik, halollik va xizmat intizomiga qat’iy rioya etish zarurligini qayd etdi. Shuningdek, korrupsiyaviy huquqbuzarliklarga yo‘l qo‘ygan shaxslarga nisbatan qonunchilikda belgilangan javobgarlik choralari, bunday holatlarning salbiy oqibatlari yuzasidan batafsil tushuntirishlar berildi.

Tadbir davomida barcha ishtirokchilar korrupsiyaning har qanday ko‘rinishidan yiroq bo‘lish, xizmat vazifalarini vijdonan va mas’uliyat bilan bajarish, fuqarolarga sifatli va shaffof davlat xizmatlarini ko‘rsatish bo‘yicha ogohlantirildi hamda bu boradagi mas’uliyatni yanada kuchaytirish yuzasidan tegishli tavsiyalar berildi.