Murojaat va takliflardan amaliy natijalar sari. Beruniy tumani hokimi yoshlar tadbirkorligiga jiddiy e'tibor qaratdi.
2026-07-11 18:05:00 / Yangiliklar
Hudud rahbarlarining yoshlar bilan haftaning har payshanba kungi uchrashuvlari davomida ularning taklif va fikrlaridan kelib chiqqan holda yordam berish tizimi yo'lga qo'yilgan. Beruniy tumani hokimi Ikram Xidirov tuman yoshlari bilan o'tkazgan navbatdagi uchrashuvi davomida, o'z tadbirkorligini boshlash istagidagi yoshlarga baliqchilik tarmog'ini rivojlantirish, bu borada tumanda imkoniyatlar mavjudligi borasida takliflarni ilgari surgan edi. Bugun esa Oltinsoy ovul fuqarolar yig'ini hududida tashkil etilgan sun'iy ko'llarda boqilayotgan baliqlar, shuningdek, shu hududdan farmon asosida tadbirkorlarga berilishi rejalashtirilayotgan sun'iy ko'l xavzalariga yoshlar bilan biznes sayoxat tashkil etildi. “Baliqchilik tarmog'ini rivojlantirishga oid qo'shimcha chora-tadbirlar to'g'risida" gi Prezident Farmoni (PF–122-son, 02.07.2026 y.) qabul qilindi. Farmon asosida Beruniy tumanida qarib 500 gektar yer maydonida sun'iy ko'llar tashkil etilib, auktsion asosida 49 yilga ijara shartnomasi asosida berilishi rejalashtirilgan. Baliqchilik yo'nalishini yanada rivojlantirish, aholining baliq mahsulotlariga bo'lgan iste'mol talabidan kelib chiqqan holda ichki bozorga arzonlashtirilgan baliq mahsulotlarini yetkazib berish asosiy maqsad hisoblanadi. Beruniy tumani hokimi o'rinbosari Davronbek Karimov boshchiligida o'tkazilgan biznes sayohat davomida yoshlar, baliqchilik yo'nalishida o'zlarini qiziqtirgan savollarga sohada faoliyat yuritayotgan tadbirkorlardan javob oldi. Ajratiladigan yerlarda yoshlarga beriladigan imkoniyatlar bilan ham tanishdi.