Toshkent shahar Bektemir tumani hokimligi

Bektemir tumani hokimining mahalla faollari, deputatlar va tadbirkorlariga murojaati

Assalomu alaykum, hurmatli deputatlar, tuman faollari, Bektemir tumani aholisi, qadrli tadbirkorlar!

Kuni kecha Davlatimiz rahbari tomonidan aholi turmush farovonligini oshirish, kambag‘allikni qisqartirish, ishsizlikni bartaraf etish hamda tadbirkorlik subyektlari uchun qulay shart-sharoitlar yaratish tuman hokimlarining eng ustuvor vazifasi etib belgilab berildi.

Menga, Davlatimiz rahbari juda muhim bir talabni qo‘ydilar:

“Har bir tuman hokimi qaysi ko‘chada, qachon, nima o‘zgarish bo‘lishini mahalliy kengashda himoya qilib, aholiga e’lon qilishi kerak. Ana shunda odamlar har bir loyiha vaqtida topshirilishi va sifatini o‘zi talab qilib oladi”, deb ta’kidladilar.

Shuning uchun bugun aniq manzilli ro‘yxat, aniq sanalar va raqamlarga asoslangan rejalarimizni sizlarga taqdim etaman.

Biz oldinga siljish uchun, avvalo, tumanimizdagi real holat va kamchiliklarni ochiq tan olishimiz kerak. Tumanimizda aholi bandligini ta’minlash va oilalar daromadini oshirish borasida hali foydalanilmagan imkoniyatlar juda ko‘p.

• Tumanimizda maktab va maktabgacha ta’lim qamrovining pastligi bu tumanimizga yarashmaydigan ko‘rsatkichdir;
• Tumanimizda sanoat va xizmat ko‘rsatish sohasida iqtisodiy ko‘rsatkichlarning yuqori o‘sish sur’atlarini ta’minlashda kamchiliklar bor;
• Shu bilan birgalikda, Zabardast mahallasi va Iyk ota mahallasining to‘rtdan bir qismida ichimlik suvi yo‘q;
• “Musaffo”, “Sohil”, “Zabardast” va “Iyk ota” mahallalarida ko‘cha yoritish chiroqlari o‘rnatilmagan ko‘chalar mavjud;
• Elektr ta’minotidagi uzilishlarni bartaraf etish uchun tumanda 15 ta transformatorni almashtirish talab etiladi;
• Korxona va tashkilotlarda 4,1 mingdan ziyod o‘rta-maxsus ma’lumotli xodimlarga ehtiyoj bo‘lsa-da, zamonaviy kasb-hunarga o‘qitadigan birorta texnikum yoki markazimiz yo‘q.

Yuqorida sanab o‘tilgan barcha muammo va og‘riqli masalalarni men tuman rahbari sifatida o‘zimning asosiy kamchiligim deb bilaman.

Bugun Sizlarning huzuringizda to‘liq ishonch bilan aytamanki, ushbu muammolarning yechimi bo‘yicha barcha imkoniyat va resurslarni safarbar etib, shaxsiy mas’uliyat va javobgarlikni to‘liq zimmamga olaman.

Birinchidan: tumanda infratuzilmani rivojlantirishda quyidagi loyihalar amalga oshiriladi:

Mahallani yashil hududga aylantirish, obodonlashtirish va xavfsiz muhit yaratish bo‘yicha tizimli ishlar olib boriladi.

• Bu yil dasturga kiritilgan “Barhayot” ko‘chasi bilan cheklanib qolmasdan, ishni Bektemir shoh ko‘chasi, Husayn Boyqaro, Farg‘ona yo‘li ko‘chalarida ham boshlaymiz;
• Ko‘chalarda aholi uchun qulay va xavfsiz 14 km piyoda yo‘laklari quriladi;
• Ko‘chalarda xavfsizlikni ta’minlash maqsadida 120 ta kuzatuv kamerasi va 500 ta ko‘cha yoritish chiroqlari o‘rnatiladi;
• Ushbu ko‘chalarda 23 ming kvadrat metr yashil hududlar tashkil etilib, 140 ta o‘rindiq o‘rnatiladi, 2 ta yashil bog‘ va 1 ta sun’iy ko‘l tashkil qilinadi;
• Har bir ko‘cha bo‘yicha mas’ul hokim o‘rinbosari va pudratchi nomi, ishning boshlanish va tugash sanasi mahallaning e’lon taxtasiga osib qo‘yiladi;
• “Zilola”, “Iqbol”, “Mirishkor”, “Abay” mahallalarida qurilish va obodonlashtirish ishlari olib boriladi, har bir loyiha mahalla faollari ishtirokida muhokama qilinadi;
• Shuningdek, “Musaffo” va “Nurli yo‘l” mahallalari uchun sport-sog‘lomlashtirish maydoni va Nuroniylar maskani tashkil etiladi;
• “Nurafshon” va “Abay” mahallalarida oqova suv tarmog‘iga ulanadi;
• “Nurli yo‘l” va “Zabardast” mahallalariga mahalla idoralari quriladi;
• “Zabardast” va “Gulbog‘” mahallalarida 8 gektar yer maydonida buta ko‘chatlarini yetishtirish bog‘i tashkil qilinadi;
• “Musaffo”, “Sohil”, “Zabardast” va “Iyk ota” mahallalarida ko‘cha yoritish chiroqlari o‘rnatiladi;
• Elektr ta’minotini yaxshilash maqsadida 15 ta transformator o‘rnatiladi;
• Ohangaron shoh ko‘chasining Mirishkor mahallasi hududidan o‘tuvchi qismida piyodalar uchun yer osti yo‘lagi quriladi.

Keltirilgan loyihalarning o‘z vaqtida amalga oshirilishini va kuz-qish mavsumini betalofat o‘tkazilishini ta’minlash uchun shaxsan javob beraman.

Ikkinchidan, iqtisodiy barqarorlikni ta’minlash, aholi bandligini ta’minlash va yangi ish o‘rinlarini tashkil etishda:

• Yil yakuni bilan sanoat mahsulotlarini ishlab chiqarish hajmini 25,6 trln so‘mga (o‘sish sur’ati 107,1 foizga) va xizmatlar hajmini 11,1 trln so‘mga (o‘sish sur’ati 118,5 foizga) bajarilishini ta’minlayman;
• Tuman iqtisodiyotiga jami 500 mln AQSh dollari miqdorida investitsiya jalb qilinadi;
• Oltintopgan, Mirishkor va Gulbog‘ mahallalari hududidagi 353,9 gektar sanoat hududida 603 ta tadbirkor bilan ishlab va investitsiya loyihalarini ishga tushirish hisobiga 1,6 mingta ish o‘rni tashkil etiladi;
• Yil yakuniga qadar tijorat banklari bilan birgalikda 140 ta yangi tadbirkorlik subyekti ishga tushirilib, 1,2 mingta yangi ish o‘rni tashkil etiladi;
• Kambag‘allikni qisqartirish borasida 176 ta oilaning daromadi oshiriladi, 256 nafar ishsiz fuqaro ishga joylashtiriladi, 35 ta o‘zini o‘zi band qilish va 40 ta mikroloyiha ishga tushiriladi;
• Bugungi kunda tumandagi 1530 ta ishsiz fuqaroning bandligi ta’minlanadi.

Bu esa, o‘z navbatida, tumanimizni yil yakuniga qadar kambag‘allik va ishsizlikdan xoli hududga aylantirishga va’da beraman.

Bu vazifalardan tashqari, tumanimizning kuch-quvvati va imkoniyatlarini ishga solib, nafaqat tumanimiz, balki Toshkent viloyati va boshqa hududlar aholisini ham ish bilan ta’minlaydigan katta markazga aylantiraman.

Yil oxirigacha ishsiz bo‘lgan 800 nafar fuqaroni tumanimizdagi 60 ta korxonadagi tayinli va doimiy daromadli ish o‘rinlariga joylashtiraman.

Uchinchidan, ta’lim, yoshlar va ijtimoiy sohani rivojlantirishda:

• 2 ta maktabgacha ta’lim tashkilotida mavjud hududning o‘zida 630 o‘rinli qo‘shimcha bino qurish hisobiga mahallalardagi aholi ehtiyojini to‘liq qoplash choralari ko‘riladi;
• Bundan tashqari, aholisi eng zich “Zilola”, “Iyk ota” mahallalarida 2 ta yangi maktabgacha ta’lim tashkiloti quriladi.

Bektemir tumani hokimi sifatida:

Rahbarlarning shaxsiy mas’uliyati kuchaytirilib, har bir loyiha ijrosi bo‘yicha haftalik va oylik natijadorlik tahlillari yo‘lga qo‘yiladi.

Yuqorida aytilgan har bir loyiha bo‘yicha mas’ul va muddat ochiq e’lon qilinadi. Mahalliy kengash yig‘ilishida shu reja bo‘yicha birinchi hisobotni beraman va muddati o‘tgan har bir obyekt bo‘yicha sababini o‘zim tushuntiraman.

2026 yil yakuniga qadar belgilangan maqsadlarga erishish, 2027 yilda esa iqtisodiyot, ta’lim, sog‘liqni saqlash, ekologiya bo‘yicha 6 trln 769 mlrd so‘mlik 53 ta yangi loyihani amalga oshirib, boshlangan ishlarni yangi bosqichga olib chiqishga kafolat beraman.

Sizlardan esa, tumanda tashkil etilgan Vaziyatlar markaziga 24/7 tizimda har qanday murojaatlaringizni Telefon raqami: 1134, Telegram kanal/bot: @BektemirMurojaat_Bot orqali yuborishingiz so‘raladi.

Aziz tumdoshlar va hurmatli ishbilarmonlar!

Yuqorida belgilangan har bir maqsad ortida tumanimiz farovonligi va xalqimizning ertangi kunga bo‘lgan ishonchi mujassam.

Barcha kuch va imkoniyatlarimizni safarbar etgan holda, tumanimizni kambag‘allik va ishsizlikdan batamom xoli hududga aylantirishga hamda erishilgan bu natijani barqaror saqlab qolishga qat’iy va’da beraman.

Ishonchim komilki, sizlarning qo‘llab-quvvatlashingiz, halol mehnatingiz va kuchli jamoatchilik nazorati bilan biz ko‘zlangan marralarga albatta erishamiz hamda Bektemir tumanimizni poytaxtdagi eng ilg‘or, obod va namunali hududlardan biriga aylantiramiz.

Tumanimizning farovon kelajagi va yuksalishi yo‘lida barchamiz bir tan-u bir jon bo‘lib harakat qilaylik!