Jizzax viloyati Arnasoy tumani hokimligi

Arnasoy tumanida yosh avlodning ma'naviy-axloqiy tarbiyasiga, bilim olish sharoitlarini yaxshilashga alohida e’tibor qaratilmoqda. Jumladan, Arnasoy tuman hokimi Odil Musanovning tashabbusi bilan tumandagi barcha maktab kutubxonalari uchun 51 million so‘mdan mablag‘ ajratilib, kutubxonalarning kitob fondi va jihozlari yangilanmoqda.

Bu tashabbus doirasida “Bo‘ston” mahallasidagi 5 va 13-sonli umumta’lim maktablariga ham yangi kitoblar va jihozlar yetkazib berildi. Maktab rahbariyati va mas’ullar bilan uchrashuv chog‘ida kitoblarning to‘g‘ri joylashtirilishi, jihozlarni qulay va samarali tarzda o‘rnatish hamda kutubxonalarni kengaytirish yuzasidan tegishli tavsiyalar berildi.

Xususan, kitoblarni yoshlar qiziqishi va fanlar bo‘yicha saralab joylashtirish, ularni elektron ro‘yxatga olish va kutubxona ichki muhitini yorqin va ko‘ngilochar qilib tashkil etish takliflari bildirildi. Shu bilan birga, o‘quvchilar uchun kutubxonada o‘qish burchaklari yaratish, raflar va stollarni qulay joylashtirish masalalariga alohida e’tibor qaratildi.

Mazkur ishlar natijasida maktab kutubxonalari nafaqat boy ma’naviy manba, balki yoshlar uchun yoqimli, ilhomlantiruvchi maskanga aylanishi kutilmoqda. Tumandagi ta’lim muassasalarida bu kabi yangilanishlar orqali kitobga muhabbat, bilimga chanqoqlikni oshirish yo‘lida izchil ishlar olib borilmoqda.

Arnasoy tumani hokimligi Axborot xizmati