Jizzax viloyati Arnasoy tumani hokimligi

Dastlabki faoliyatlaridan birini Jizzax viloyati Arnasoy tumanining eng chekka hududlaridagi sho‘rxok va chakalakzor bo‘lib yotgan qarovsiz yerlarda boshlagan BMB HOLDING bugunga kelib shu yerlik mahalliy aholi ishonchini to‘la oqlab ulgurdi.

Muqaddam paxta, g‘alla va ba’zida dukkakli ekinlardan boshqa narsa ekishga jazm qilinmagan mazkur maydonlarda bugungi kunda ilmiy va innovatsion yondashuv asosida sabzavotlar, xususan, pomidordan mo‘l hosil olinmoqda.

Qolaversa, nafaqat qishloq xo‘jaligi mahsulotlari yetishtirish, balki aholi bandligini ta’minlash, ularning moddiy ta’minotini yaxshilash ham Holdingning bosh maqsadlaridan biriga aylangan.

Ahamiyatlisi, ushbu jarayonda xodimlarni dala boshiga olib borib kelish uchun maxsus avtobuslar, tibbiyot xodimlari, qo‘li shirin oshpazlarni ta’minlash ham e’tibordan chetda qolmadi. Bu yerda birinchi navbatda mutaxassislar tomonidan maxsus laboratoriyalarda tuproq unumdorligi tahlil qilinib, shunga ko‘ra qishloq xo‘jaligi ekinlarini ertangi kunda qaysi kasalliklarga qarshi agrotexnik tadbirlar olib borish ham oldindan reja qilinadi.

– Odatda tumanimiz paxta va g‘allaga ixtisoslashgan bo‘lib, ba’zida bo‘sh maydonlarga mosh ekilardi. Lekin oxirgi 2-yilda BMB HOLDING tomonidan sinov tariqasida sabzavot ekish amaliyotining joriy qilinishi o‘zini oqladi, - deydi Arnasoy tumani hokimi o‘rinbosari Xayriddin Suyarov. – Masalaning yana bir tomoni suv bilan bog‘liq bo‘lib, tumanimizda qishloq xo‘jaligi ekinlarini sug‘orish katta muammo edi. “Gidrogel” polimer moddasi biz uchun yangilik bo‘ldi.

Arnasoy hududida suv tanqisligi juda yuqori bo‘lib, bu muammoga ham ijobiy yechim topish ustida mas’ullar bosh qotirishmoqda. Masalaga yanada aniqroq yondashadigan bo‘lsak, har bir pomidor ko‘chati ostiga 40-45 % foizgacha suvni tejash imkoniyatini beradigan AgroNanoGel Basic gidrogel kabi nou-xaular qo‘llanilmoqda.

O‘tgan yillar tajribasidan kelib chiqib aytadigan bo‘lsak, aynan mazkur modda qo‘llanilgan maydonlarda har bir tupdan olinadigan hosil odatdagiga qaraganda 3-4 kilogrammgacha ko‘paygani o‘z isbotini topgan.

BMB AGRO maydonlariga ekiladigan pomidor navlari ham ilmiy yondashuv asosida tanlanganligi e’tiboringizni tortishi shubhasiz. Birinchi galda bozorbop, xaridorgir, qolaversa katta maydonlarda qayta ishlashga mo‘ljallangan navlar parvarishlanmoqda.

Holding bu borada yana bir e’tiborli ishni yo‘lga qo‘yganki, bu ham bo‘lsa urug‘chilikni shu yerning o‘zida yo‘lga qo‘yish, yangi navlar ustida izlanishlar olib borishdir. Buning natijasida Arnasoy tumani iqlimiga moslashtirilgan – “Agronur-78” navi yaratilgan bo‘lib, uning o‘suv davri 110-120 kunni, bir tupdagi hosil 4-5 kilogrammni tashkil etadi. Kasalliklarga chidamli, qayta ishlashga juda qulayligi bilan ahamiyatli.

Shu sababli ham asosiy maydonlarga aynan pomidorning xuddi shu navi ekilmoqda. Bundan tashqari dalalarga “RedStar-F1”, “Riogrand” kabi pomidor navlari ham ekilmoqda. Ushbu navlar ham bugungacha sinovdan samarali o‘tib, soha ilmiy xodimlari tomonidan tavsiya etilgan.

– Bugungi kunda yerning har qarichidan unumli foydalanish – qishloq xo‘jaligida katta ahamiyatga ega. Bugungi pomidor ekish tadbirida 500 ga yaqin mavsumiy va doimiy xodimlar ishtirok etmoqda, - deydi BMB AGRO korxonasi bosh direktori Baxrom Qarshiboyev. – O‘tgan yili 20 gektar pomidor ekilgan bo‘lsa, bu yil 50 gektarga yetkazishni rejalashtirganmiz. Mazkur jarayon orqali nafaqat hosil olishni, balki zamonaviy agrotexnologiyalarni amaliyotga joriy etishni ham maqsad qildik.

Bir so‘z bilan aytganda, maqsad - avvalo ichki bozorda qishloq xo‘jaligi mahsulotlariga bo‘lgan talabni to‘la qondirish, mazkur mahsulotlarni chuqur qayta ishlab eksportga chiqarish, qolaversa mahalliy aholi bandligini ta’minlagan holda ularning turmush farovonligini yanada oshirishdan iboratdir.

 Arnasoy tumani hokimligi Axborot xizmati