Jizzax viloyati Arnasoy tumani hokimligi

«Zamonaviy agrar tajriba — chigit bilan zirani birgalikda ekish orqali hosildorlikni oshirish va iqtisodiy samaradorlikka erishish»

Arnasoy tumani hokimi O.Musanov

Arnasoy tumanida qishloq xo‘jaligida innovatsion yondashuv asosida yangi agrar loyiha amalga oshirilmoqda. Bu borada Xitoylik investorlar tumandagi Samarqand SIUda 230 gektar yer maydoniga xitoyning S-6636 navi chigit 76x10 sxemada ekilib uning orasiga zira o‘simligini qo‘shib ekishni boshladilar. Bu loyiha nafaqat hosildorlikni oshirish, balki yerdan unumli va samarali foydalanishga ham xizmat qiladi.

Agrar sohada ko‘p yillik tajriba shuni ko‘rsatadiki, bir xil yerda faqatgina bitta turdagi ekin ekish uning unumdorligini pasaytirishi mumkin. Shu bois, fermerlar xitoy chigiti bilan birga zira ekish amaliyotini sinovdan o‘tkazmoqda. Bu usulning afzalligi shundaki, xitoy chigiti asosiy paxta xomashyosi sifatida yetishtirilsa, orasidagi bo‘sh joylarda zira kabi qo‘shimcha qimmatli mahsulot yetishtiriladi.

Zira O‘zbekiston bozorida va jahon bozorida talab yuqori bo‘lgan eksportbop mahsulotlardan biri sanaladi. Shu bois, bu loyiha nafaqat ichki bozor uchun, balki tashqi savdo imkoniyatlarini ham kengaytiradi. Zira shifobaxsh xususiyatlari, o‘ziga xos mazasi bilan ovqatlanish sanoatida keng qo‘llaniladi.

Zira ekish jarayonida yerning namligi saqlanadi, chigit orasidagi turli o‘t-o‘lanlar kamayadi va tuproq eroziyasining oldi olinadi. Bundan tashqari, fermerlar bir yilda ikki turdagi hosil olish imkoniga ega bo‘ladi, bu esa iqtisodiy jihatdan ancha samarali hisoblanadi.

Arnasoy tumanida xitoy chigiti orasiga zira ekish amaliyoti — bu fermerlar uchun yangi, zamonaviy va unumli yechim. Bu usul agrar sohada mahsulot turlarini ko‘paytirish, yerdan samarali foydalanish va eksport imkoniyatlarini kengaytirishda muhim qadam bo‘lmoqda. Kelgusida bu loyiha yanada keng miqyosda amalga oshirilishi va boshqa hududlarda ham tatbiq etilishi kutilmoqda.

Arnasoy tumani hokimligi Axborot xizmati