Arnasoyliklar g‘alla parvarishiga muhim e’tibor qaratmoqda
2025-03-28 23:45:00 / Qishloq xo‘jaligi
Arnasoy tumanida joriy yil hosili uchun 8 ming 800 gektar maydonda g‘alla parvarishlanmoqda. Mutaxassislarning fikricha, agrotexnik tadbirlarning o‘z vaqtida sifatli bajarilayotgani hosildorlikni oshirishga zamin yaratmoqda.
– Fermerlarimiz g‘allachilikda katta tajribaga ega, – deydi "O‘zagroinspeksiya"ning Arnasoy tuman bo‘limi bosh mutaxassisi Ravshan Xoliqov. – Baravj o‘sayotgan maysalardan ham ularning omilkorligini bilsa bo‘ladi. Ekinlarni mineral o‘g‘itlar bilan oziqlantirish, begona o‘tlar va zang kasalligiga qarshi dorilash ishlari bajarilmoqda.
E’tiborli jihati, har bir fermer hosildorlikni kamida 70 sentnerdan oshirishni niyat qilgan. Hozirgi kunda 7 ta fermer xo‘jaliklarining 166,0 gektar, 356 ta fermer xo‘jaliklarida 8634,0 gektar yer maydonlariga mahalliy nav avlodga tegishli don urug‘lari ekilib, g‘alla parvarishlash davom etmoqda.
Ayni kunlarda g‘allani bahorgi ikkinchi oziqlantirish ishlari davomida 154 ta fermer xo‘jaliklaridagi 3494 gektar maydonlar azotli mineral o‘g‘itlar bilan va 4478 gektar maydonlar bargdan oziqlantirish (suspenziya) ishlari olib borilmoqda.
G‘alla parvarishida mineral o‘g‘itlarning ahamiyati katta. Ekinni oziqlantirishda mahalliy o‘g‘itdan ham foydalanilsa, nihollar baravj rivojlanadi, suvga bo‘lgan talabi kamayadi. Belgilangan chora-tadbirlar asosida dalalarga mahalliy o‘g‘it chiqarish, ekinlarni “sharbat” usulida sug‘orish va azotli o‘g‘itlar bilan oziqlantirish ishlari ham amalga oshirilmoqda.
“O‘zagroinspeksiya”ning Arnasoy tuman bo‘limi tomonidan qishloq xo‘jaligi sohasida fermer xo‘jaliklari tomonidan g‘alla parvarishi bo‘yicha olib borilayotgan ishlar nazoratga olinib, tegishli ko‘rsatmalar berib kelinmoqda.
Arnasoy tumani hokimligi Axborot xizmati