O‘zbekiston Respublikasi Adliya vazirligi huzuridagi "O‘zarxiv" Agentligi

“Oʻzbekistonni suratlarda kashf etamiz!” – Mustaqillik bayramiga bagʻishlangan tarixiy-foto koʻrgazma

2025-yil 29-avgust kuni Toshkent shahridagi Fotosuratlar uyida Oʻzbekiston Respublikasi davlat mustaqilligining 34 yilligiga bagʻishlab, “Vatan uchun, millat uchun, xalq uchun!” ezgu gʻoyasi asosida tashkil etilgan “Oʻzbekistonni suratlarda kashf etamiz!” nomli koʻrgazmaning tantanali ochilish marosimi boʻlib oʻtdi.

Mazkur tadbir “Oʻzarxiv” agentligi, Oʻzbekiston Badiiy akademiyasi, Oʻzbekiston Milliy axborot agentligi, Oʻzbekistondagi Shanxay hamkorlik tashkiloti Xalq diplomatiyasi markazi, Toshkent Fotosuratlar uyi hamda Oʻzbekiston Kinofotofono hujjatlari milliy arxivi hamkorligida tashkil etildi.

Koʻrgazmaning ochilish marosimida “Oʻzarxiv” agentligi rahbari U.M. Yusupov Shanxay hamkorlik tashkiloti Xalq diplomatiyasi markazi direktori Q.Q. Sobirov, Oʻzbekiston Badiiy akademiyasi raisi A.V. Nuriddinov, Oʻzbekiston Milliy axborot agentligi rahbari A. Koʻchimov soʻzga chiqib, mustaqillikning maʻnaviy, tarixiy va madaniy ahamiyati haqida soʻz yuritdilar. Ular bu kabi tadbirlar milliy xotirani asrash, yosh avlodda yurtga muhabbat tuygʻusini mustahkamlashda beqiyos ahamiyatga ega ekanini taʻkidladilar.

Koʻrgazmada Oʻzbekiston Kinofotofono hujjatlari milliy arxivi fondida saqlanayotgan tarixiy fotosuratlar asosida xalqimizning shonli va murosasiz yoʻli namoyon etildi.

- Namoyish etilgan suratlar quyidagi tarixiy bosqichlarni qamrab oldi:

- Buxoro va Xiva xonliklari davri,

- Turkiston ozodlik harakatlari va jadidlar faoliyati,

- Buxoro va Xiva xalq respublikalari, Turkiston muxtoriyati tarixi,

- Mustamlaka davri va mustaqillik sari olib borilgan harakatlar,

- 1991-yil 1-sentabr – Davlat mustaqilligining eʻlon qilinishi,

- Yangi Oʻzbekiston taraqqiyotining zamonaviy bosqichlari.

Har bir surat oʻzbek xalqining jasorati, milliy ongining uygʻonishi, istiqlol sari intilishi va bugungi yutuqlarining yorqin guvohidir. Koʻrgazmada taqdim etilgan fotoarxiv materiallari Oʻzbekiston tarixida chuqur iz qoldirgan voqealarni yoritish barobarida, mustaqillik yillarida erishilgan yutuqlar, fuqarolarning huquq va erkinliklarini taʻminlash yoʻlida amalga oshirilgan islohotlarni ham aks ettirdi. Bu esa Yangi Oʻzbekistonning bugungi taraqqiyot darajasini, xalqimizning fidokorona mehnatini, ijtimoiy-iqtisodiy va madaniy yuksalishini yaqqol koʻrsatib berdi.

Tadbirni yoritishda faol ishtirok etgan ommaviy axborot vositalari vakillariga “Oʻzarxiv” agentligi tomonidan alohida minnatdorchilik bildirildi.