O‘zbekiston Respublikasi Adliya vazirligi huzuridagi "O‘zarxiv" Agentligi

Joriy yil 24-aprel kuni Buxoro shahrida “O‘zbekiston - Ozarbayjon aloqalari foto hujjatlarda” kitob-albomi” taqdimoti va “O‘zbekiston va Ozarbayjon ikki qardosh xalq” mavzusidagi arxiv hujjatlari  ko‘rgazmasi xalqaro tadbiri o‘tkazildi.

Tadbirda “O‘zarxiv” agentligi rahbariyati, Ozarbayjon Milliy arxiv boshqarmasi xalqaro delegatsiyasi vakillari ishtirok etdilar.

Dastlab O‘zbekiston va Ozarbayjon  madaniyatini aks ettiruvchi sahna chiqishlari namoyish etildi. “O‘zbekiston va Ozarbayjon ikki qardosh xalq” mavzusidagi arxiv hujjatlari  ko‘rgazmasida O‘zbekiston Kinofotofono hujjatlari milliy arxivi hamda Ozarbayjon Milliy arxivi saqlovida mavjud bo‘lgan 1930-2023 yillar mobaynidagi davrni o‘z ichiga olgan ikki davlatning madaniy-gumanitar munosabatlariga oid 50 dan ortiq arxiv foto hujjatlar va ularning  ilmiy-ma’lumot tavsiflari taqdim etildi. Ko‘rgazmada O‘zbekiston vakillarining  Ozarbayjon davlatiga hamda Ozarbayjon vakillarining O‘zbekistonga tashrifi, iqtisodiyot, ilm-fan, madaniyat sohalaridagi hamkorlik, ikki xalqlarning adabiyot va san’at kunlari aks etgan hujjatlar tashrif buyuruvchilarda  alohida taassurot qoldirdi. 

Ko‘rgazmadan so‘ng, “O‘zbekiston - Ozarbayjon aloqalari foto hujjatlarda” kitob-albomi” taqdimoti o‘tkazildi. Xalqaro tadbirni Ulug‘bek Mirtalibovich Yusupov “O‘zarxiv” agentligi direktori ochib berdi. Tadbirda Rasulov Asker Odil o‘g‘li - Ozarbayjon Milliy arxiv boshqarmasi boshlig‘i, Akif Marifli - O‘zbekistondagi Ozarbayjon Elchixonasi huzuridagi Heydar Aliyev nomidagi Madaniyat Markazi direktori, tarix bo‘yicha falsafa doktori, Robert Valiyevich Almeyev - PhD/02/09.07.2020.tar.70.03. O‘zbekiston davlat tarix muzeyi huzuridagi ilmiy darajalar berish boyida ilmiy Kengash a’zosi, Karimulla Mammadzad - Madaniyat Markazi inspektori, filologiya bo‘yicha falsafa doktori, Halim To‘rayev – Buxoro davlat universiteti professori, tarix fanlari doktori, Feruz Bafoyev – Buxoro texnika universiteti dotsenti, siyosiy fanlar nomzodlari so‘zga chiqdilar.

“O‘zbekiston - Ozarbayjon aloqalari arxiv foto hujjatlarida” kitob-albomiga O‘zbekiston Kinofotofono hujjatlari milliy arxivi hamda Ozarbayjon Milliy arxivi saqlovida mavjud bo‘lgan 1930-2023 yillar mobaynidagi davrni o‘z ichiga  olgan ikki davlatning madaniy-gumanitar munosabatlariga oid 250 ga yaqin  arxiv foto hujjatlar va ularning  ilmiy-ma’lumot tavsiflari kiritilgan.

Ma’lumot uchun: Toshkent shahrida 2022-yil 20-iyunda “O‘zarxiv” agentligi bilan Ozarbayjon Respublikasi Milliy arxiv boshqarmasi o‘rtasida arxiv ishi sohasida hamkorlik to‘g‘risida Bitim “O‘zbekiston - Ozarbayjon biznes-forumi”da imzolangan va Bitim natijasi o‘laroq Tomonlar o‘z davlatlarining milliy qonunchiligiga muvofiq, tenglik va o‘zaro manfaatdorlik tamoyiliga tayangan holda arxiv ishi sohasidagi o‘zaro manfaatli hamkorlik o‘rnatildi, arxiv hujjatlari bilan almashilgan. O‘tgan davr mobaynida ikki davlatlar arxivlarida saqlanayotgan arxiv foto hujjatlari asosida “O‘zbekiston-Ozarbayjon aloqalari foto hujjatlarda” kitob-albomi tayyorlandi. Anqara shahrida 2025-yil 29-yanvarda ikki davlat tashqi ishlar vazirlari tomonidan “O‘zbekiston Respublikasi bilan Ozarbayjon Respublikasi o‘rtasida diplomatik munosabatlar o‘rnatilganligining 30 yilligini nishonlash bo‘yicha Kompleks tadbirlar dasturi” imzolandi. Aynan shu dasturda mazkur kitobning taqdimoti Buxoro va Boku shaharlarida 2025-yilda o‘tkazilishi belgilandi.

Kitob-albomlarning katta bir qismi Ozarbayjon Respublikasi Milliy arxiviga ravishda topshirildi.

Asosiy tadbirlar doirasida Ozarbayjon Respublikasi Milliy arxiv boshqarmasi Boshqarma raisi Asker Rasulov boshchiligidagi delegatsiya Buxoro shahridagi NNT va Do‘stlik uyida joylashgan Ozarbayjon milliy-madaniy markazi Buxoro viloyati bo‘limiga hamda Buxoro viloyati davlat arxiviga tashrif buyurishdi.

Xorijiy delegatsiya a’zolariga Buxoro shahridagi madaniy meros obyektlariga sayyohlik tashrifi uyushtirdi.

Tadbirda “O‘zarxiv” agentligi, O‘zbekiston milliy arxivlari rahbarlari hamda Ommaviy axborot vositalari xodimlari, jurnalistlar ishtirok etdilar.

Tadbirni yoritishda yaqindan yordam bergan ommaviy axborot vositalari vakillariga “O‘zarxiv” agentligi tomonidan minnatdorlik bildiriladi.