O‘zbekiston Respublikasi Adliya vazirligi huzuridagi "O‘zarxiv" Agentligi

O‘zbekiston va Isroil o‘rtasida arxiv ishi sohasidagi hamkorlik yangi bosqichga ko‘tarilmoqda

O‘zbekiston Milliy arxivida “O‘zarxiv” agentligi hamda Isroil Davlat arxivi rahbariyatining ikki tomonlama uchrashuvi va arxiv ishi sohasida o‘zaro anglashuv memorandumini imzolash marosimi bo‘lib o‘tdi.

Tadbirda “O‘zarxiv” agentligi direktori Ulug‘bek Yusupov, Isroil Davlatining O‘zbekiston Respublikasidagi Favqulodda va Muxtor Elchisi Gideon Lustig, Isroil Davlat arxivi bosh arxivchisi, delegatsiya rahbari Rut Avramovis, mazkur arxivning yuridik maslahatchisi Numi Aldubi, “O‘zbekiston-Isroil” do‘stlik jamiyati direktori, akademik Saidasror Gulyamov, shuningdek, arxiv sohasi mutaxassislari, olimlar va jamoatchilik vakillari ishtirok etdi.

Tadbirni “O‘zarxiv” agentligi Axborot xizmati rahbari, tarix fanlari bo‘yicha falsafa doktori (PhD) Anvarjon Aliyev olib bordi.

Uchrashuv davomida O‘zbekiston va Isroil o‘rtasida arxiv hujjatlarini saqlash, o‘rganish, raqamlashtirish hamda tarixiy-madaniy merosni kelgusi avlodlarga yetkazish borasidagi hamkorlikni yana-da kengaytirish masalalari muhokama qilindi.

Taʼkidlanganidek, ikki mamlakat arxiv muassasalari o‘rtasidagi aloqalar izchil rivojlanib kelmoqda. Xususan, 2021 yilda “O‘zarxiv” agentligi va Yahudiy xalqi tarixi markaziy arxivi o‘rtasida hamkorlik memorandumi imzolangan. 2022 yilda esa O‘zbekiston delegatsiyasining Isroilga tashrifi doirasida ushbu mamlakatning yetakchi arxiv muassasalari faoliyati o‘rganilib, “Yad Vashem” memorial majmuasi arxivi bilan hamkorlik to‘g‘risida memorandum imzolangan.

Mazkur hamkorlik arxiv hujjatlari asosida qo‘shma ilmiy tadqiqotlar olib borish, tarixiy manbalarni aniqlash va o‘rganish, shuningdek, arxiv sohasida ilg‘or tajriba almashish uchun muhim asos bo‘lib xizmat qilmoqda.

Tadbirda “O‘zarxiv” agentligi direktori Ulug‘bek Yusupov tomonidan O‘zbekistonda arxiv ishini rivojlantirish, sohani raqamlashtirish, arxiv hujjatlarining saqlovini taʼminlash va ulardan foydalanish imkoniyatlarini kengaytirish borasida amalga oshirilayotgan islohotlar yuzasidan taqdimot o‘tkazildi.

Shuningdek, tarix fanlari doktori Muhayyo Isakova tomonidan “O‘zbekiston — najot yurti” mavzusida ilmiy taqdimot namoyish etildi. Unda Ikkinchi jahon urushi yillarida O‘zbekistonga evakuatsiya qilingan aholi, jumladan, yahudiy millati vakillarining taqdiri, ularni qabul qilish va joylashtirish jarayonlari hamda xalqimizning insonparvarlik va bag‘rikenglik fazilatlarini aks ettiruvchi tarixiy arxiv hujjatlari haqida maʼlumot berildi.

Mazkur yo‘nalishdagi tadqiqotlar xalqlar o‘rtasidagi tarixiy aloqalarni chuqur o‘rganish, inson taqdiri bilan bog‘liq muhim maʼlumotlarni ilmiy muomalaga kiritish va umumiy tarixiy xotirani asrab-avaylashda alohida ahamiyat kasb etishi qayd etildi.

Tadbirning eng muhim voqeasi — “O‘zarxiv” agentligi va Isroil Davlat arxivi o‘rtasida arxiv ishi sohasida o‘zaro anglashuv memorandunining imzolanishi bo‘ldi.

Hujjatni “O‘zarxiv” agentligi direktori Ulug‘bek Yusupov hamda Isroil Davlat arxivi bosh arxivchisi Rut Avramovis imzoladi.

Mazkur memorandum ikki mamlakat arxiv muassasalari o‘rtasida institutsional hamkorlikni mustahkamlash, arxiv hujjatlarini o‘rganish va saqlash bo‘yicha tajriba almashish, qo‘shma ilmiy loyihalarni amalga oshirish hamda arxiv ishiga zamonaviy texnologiyalarni joriy etish uchun yangi imkoniyatlar yaratishi kutilmoqda.

Marosim davomida tomonlar o‘zaro esdalik sovg‘alari almashib, rasmiy suratga tushdilar.

Tadbirda Isroil Davlatining O‘zbekiston Respublikasidagi Favqulodda va Muxtor Elchisi Gideon Lustig hamda “O‘zbekiston — Isroil” do‘stlik jamiyati raisi, akademik Saidasror G‘ulomov so‘zga chiqib, ikki davlat o‘rtasidagi do‘stona munosabatlar, ilmiy-madaniy aloqalar va tarixiy xotirani asrab-avaylash borasidagi hamkorlikning ahamiyatiga eʼtibor qaratdilar.

Rasmiy uchrashuv yakunida Isroil delegatsiyasi aʼzolari uchun O‘zbekiston Milliy arxivi hamda O‘zbekiston Kinofotofono hujjatlari milliy arxivi bo‘ylab ekskursiya tashkil etildi. Mehmonlar arxivning tarixiy hujjatlar fondlari, hujjatlarni saqlash sharoitlari, raqamlashtirish jarayonlari hamda milliy hujjatli merosni muhofaza qilish borasida olib borilayotgan ishlar bilan tanishdilar.

“O‘zarxiv” agentligi va Isroil Davlat arxivi o‘rtasida imzolangan memorandum arxiv sohasidagi xalqaro hamkorlikni yana-da rivojlantirish, tarixiy hujjatlarni birgalikda tadqiq etish va xalqlarimiz o‘rtasidagi do‘stlik rishtalarini mustahkamlash yo‘lida muhim qadam bo‘ldi.

“O‘zarxiv” agentligi Axborot xizmati