“O‘zarxiv” agentligida Germaniya delegatsiyasi bilan uchrashuv bo‘lib o‘tdi
2026-09-29 18:25:00 / Yangiliklar
“O‘zarxiv” agentligida Germaniya delegatsiyasi bilan uchrashuv bo‘lib o‘tdi
2026-yil 29-sentabr kuni “O‘zarxiv” agentligi direktori U.Yusupov va Germaniya Federativ Respublikasining Germaniya Demokratik Respublikasi diktaturasi tarixini tadqiq qilish Federal jamg‘armasi direktori Dr. Anna Kaminski boshchiligidagi delegatsiya o‘rtasida uchrashuv bo‘lib o‘tdi.
Uchrashuvda “O‘zarxiv” agentligi direktori Ulug‘bek Yusupov, Xalqaro aloqalar bo‘yicha bosh mutaxassis D. Dadayeva, O‘zbekiston Milliy arxivi direktori D. Zakirova, O‘zbekiston Milliy arxivi katta ilmiy xodimi M. Isakova, O‘zbekiston Milliy arxivi katta ilmiy xodimi N. Mirzayev ishtirok etdi.
Uchrashuv davomida O‘zbekiston arxiv tizimida amalga oshirilayotgan islohotlar, arxiv hujjatlarini saqlash, arxiv fondlarini raqamlashtirish, zamonaviy texnologiyalarni joriy etish hamda xalqaro hamkorlikni kengaytirish borasidagi ishlar haqida ma’lumot berildi.
Shuningdek, qatag‘on davri tarixi va siyosiy ta’qiblar bilan bog‘liq arxiv hujjatlarini o‘rganish, saqlash va ulardan foydalanish, ushbu yo‘nalishda faoliyat yurituvchi muassasalar o‘rtasida xalqaro hamkorlikni rivojlantirish hamda o‘zaro tajriba almashish masalalari muhokama qilindi. Tomonlar arxiv hujjatlari asosida tarixiy xotirani saqlash, ilmiy-tadqiqot va ma’rifiy loyihalarni amalga oshirish hamda hamkorlikning amaliy yo‘nalishlarini rivojlantirish yuzasidan fikr almashdilar.
Uchrashuv yakunida Germaniya delegatsiyasi uchun O‘zbekiston Milliy arxivi bo‘ylab ekskursiya tashkil etilib, mehmonlar arxiv hujjatlarini saqlash sharoitlari, fondlar bilan ishlash hamda hujjatlardan tadqiqot va foydalanish jarayonlari bilan yaqindan tanishdilar.