O‘zbekiston Respublikasi Adliya vazirligi huzuridagi "O‘zarxiv" Agentligi

“O‘zarxiv” agentligi vakillari hamrohligida Ummon Sultonligi delegatsiyasi Sharqshunoslik institutida bo‘ldi

“O‘zarxiv” agentligi vakillari hamrohligida Ummon Sultonligi Hujjat va arxivlar boshqarmasi direktori Hamad bin Muhammad al-Davyaniy hamda Ummon Sultonligining O‘zbekistondagi Favqulodda va Muxtor Elchisi Vafo Jabr Nosir al-Busaidiy xonim boshchiligidagi delegatsiya O‘zbekiston Respublikasi Fanlar akademiyasi Abu Rayhon Beruniy nomidagi Sharqshunoslik institutiga tashrif buyurdi.

Tashrif davomida mehmonlar institutning tarixi, bugungi kundagi ilmiy-tadqiqot faoliyati hamda dunyo miqyosida e’tirof etilgan qo‘lyozmalar fondi bilan tanishdilar. Delegatsiya vakillari fondlarda saqlanayotgan noyob qadimiy sharq qo‘lyozmalari, tarixiy hujjatlar va asarlarni katta qiziqish bilan ko‘zdan kechirdilar.

Shuningdek, mutaxassislar tomonidan noyob manbalarni asrash, konservatsiya qilish, restavratsiya etish va raqamlashtirish jarayonlari haqida batafsil ma’lumot berildi.

Tashrifning keyingi qismida institut rahbariyati, yetakchi olimlar va tadqiqotchilar ishtirokida uchrashuv o‘tkazildi. Unda O‘zbekiston va Ummon Sultonligi o‘rtasidagi tarixiy, ilmiy va madaniy aloqalarni yanada rivojlantirish, arxivshunoslik va manbashunoslik yo‘nalishlarida tajriba almashish hamda qo‘shma ilmiy tadqiqotlarni yo‘lga qo‘yish masalalari muhokama qilindi.

Uchrashuv yakunida Ummon Sultonligining Abu Rayhon Beruniy nomidagi Sharqshunoslik institutining yangi binosi qurilishidagi ishtirokiga bag‘ishlangan film namoyish etildi hamda mehmonlarga esdalik sovg‘alari topshirildi.

Mazkur tashrif O‘zbekiston va Ummon Sultonligi o‘rtasida arxivshunoslik, manbashunoslik, tarixiy qo‘lyozmalarni asrash va raqamlashtirish yo‘nalishlarida o‘zaro tajriba almashish hamda ilmiy hamkorlikni yangi bosqichga olib chiqishga xizmat qiladi.