O‘zbekiston Respublikasi Adliya vazirligi huzuridagi "O‘zarxiv" Agentligi

“O‘zarxiv” agentligi direktori U. Yusupov Mirzo Ulug‘bek nomidagi O‘zbekiston Milliy universiteti Tarix fakulteti talabalari bilan uchrashuv o‘tkazdi.

Mazkur uchrashuv O‘zbekiston Respublikasi Prezidentining yoshlar bilan ishlash, ularning bandligini ta’minlash, kasbiy salohiyatini oshirish hamda davlat organlari faoliyatida yosh mutaxassislarning rolini kuchaytirishga qaratilgan qaror va topshiriqlari ijrosi doirasida tashkil etildi.

Samimiy va ochiq muloqot tarzida o‘tgan uchrashuv davomida talabalar arxiv sohasi faoliyati, tizimdagi zamonaviy islohotlar hamda istiqboldagi ustuvor vazifalar haqida batafsil ma’lumotlarga ega bo‘ldilar.

Xususan, “O‘zarxiv” agentligi direktori tomonidan arxiv tizimida amalga oshirilayotgan keng ko‘lamli islohotlar, hujjatlarni raqamlashtirish jarayonlari, elektron arxivlarni shakllantirish, axborot-kommunikatsiya texnologiyalarini joriy etish, milliy arxiv fondi hujjatlarining saqlanishini ta’minlash hamda aholiga ko‘rsatilayotgan xizmatlar sifatini yanada oshirish bo‘yicha olib borilayotgan ishlar yuzasidan atroflicha ma’lumot berildi.

Shuningdek, uchrashuv davomida yoshlarning arxiv sohasi rivojidagi o‘rni, malakali va zamonaviy fikrlaydigan kadrlarni tayyorlash masalalariga ham alohida e’tibor qaratildi. Talabalar o‘zlarini qiziqtirgan savollar bilan murojaat qilib, sohaga oid taklif va fikr-mulohazalarini bildirdilar.

Uchrashuv yakunida Agentlik direktori yoshlarning faolligi, tashabbuskorligi va sohaga bo‘lgan qiziqishini yuqori baholab, ularni kelgusida ham o‘z ustida muntazam ishlashga, zamonaviy bilim va ko‘nikmalarni egallashga hamda kasbiy mahoratini oshirib borishga chaqirdi. Shuningdek, talabalarga o‘qish va kelgusidagi mehnat faoliyatida muvaffaqiyatlar tiladi.

Tadbir so‘ngida Mirzo Ulug‘bek nomidagi O‘zbekiston Milliy universiteti Tarix fakulteti muzeyi faoliyati bilan tanishilib, unda saqlanayotgan tarixiy eksponatlar va noyob materiallar ko‘zdan kechirildi.