“Audiovizual hujjatlar qiymatini ekspertiza qilish va ular bilan davlat hamda mahalliy arxivlarni to‘ldirish” mavzusida xalqaro davra suhbati tashkil etildi.
2026-04-24 17:00:00 / Yangiliklar
VNIIDAD — Butunrossiya hujjatshunoslik va arxiv ishi ilmiy-tadqiqot instituti tomonidan “Audiovizual hujjatlar qiymatini ekspertiza qilish va ular bilan davlat hamda mahalliy arxivlarni to‘ldirish” mavzusida xalqaro davra suhbati tashkil etildi.
Mazkur tadbirda Belarus, Qozog'iston va O'zbekiston arxiv sohasi mutaxassislari ham videokonferens-aloqa shaklida ishtirok etib, zamonaviy yondashuvlar va ilg‘or tajribalar yuzasidan fikr almashdilar.
Tadbir doirasida Zulfiya Suleymanova — O‘zbekiston Kinofotofono hujjatlari milliy arxivi ilmiy-ma’lumotnoma apparati va metodik ishlar bo‘limi mudiri ishtirok etib, audiovizual hujjatlar qiymatini aniqlashning o‘ziga xos jihatlari, ularni saralash mezonlari hamda milliy arxiv fondlarini zamonaviy usullar asosida boyitish masalalariga bag‘ishlangan ma’ruza bilan chiqdi.
Ma’ruza davomida audiovizual hujjatlarni saqlash, raqamlashtirish va ularning ilmiy ahamiyatini oshirish bo‘yicha dolzarb masalalar yoritildi. Shuningdek, O‘zbekiston tajribasi misolida arxivlarni komplektlashning samarali mexanizmlari haqida batafsil ma’lumot berildi. Ishtirokchilar tomonidan ma’ruza katta qiziqish bilan tinglanib, mavzu yuzasidan savol-javoblar va muhokamalar o‘tkazildi.
Mazkur tadbir xalqaro hamkorlikni mustahkamlash, tajriba almashish hamda arxiv ishi sohasida zamonaviy yondashuvlarni joriy etishda muhim ahamiyat kasb etdi.