O‘zbekiston Respublikasi Adliya vazirligi huzuridagi "O‘zarxiv" Agentligi

Tatariston delegatsiya vakillari G‘alaba bog‘i hamda “Shon-sharaf” muzeyiga tashrif buyurdilar.

Ushbu tashrif doirasida mehmonlar uchun mazmunli va puxta tashkil etilgan ekskursiya dasturi yo‘lga qo‘yildi.

Ekskursiya davomida delegatsiya aʼzolari G‘alaba bog‘ining yaratilish tarixi, uning konseptual mazmuni, urush yillarida xalqimizning jasorati va fidoyiligini aks ettiruvchi yodgorliklar bilan yaqindan tanishdilar. Bog‘ hududida barpo etilgan haykallar, memorial majmualar hamda tematik kompozitsiyalar mehmonlarda katta taassurot qoldirdi.

Shundan so‘ng, mehmonlar “Shon-sharaf” muzeyiga tashrif buyurib, Ikkinchi jahon urushi davriga oid boy ekspozitsiyalarni tomosha qildilar. Muzeyda namoyish etilgan tarixiy hujjatlar, fotosuratlar, shaxsiy buyumlar va interaktiv ko‘rgazmalar orqali urush yillaridagi voqealar, front ortidagi hayot, xalqimizning matonati va mardligi haqida batafsil maʼlumotlarga ega bo‘ldilar.

Ekskursiya davomida mutaxassis gidlar tomonidan har bir ekspozitsiya yuzasidan batafsil tushuntirishlar berildi, delegatsiya aʼzolarining savollariga atroflicha javob qaytarildi. Ushbu tashrif mehmonlarga O‘zbekiston xalqining tarixiy xotirasi, jasorat anʼanalari va milliy qadriyatlari haqida chuqur tasavvur hosil qilish imkonini berdi.

Mazkur madaniy-maʼrifiy tashrif delegatsiya aʼzolarida katta taassurot qoldirib, xalqlar o‘rtasidagi o‘zaro hurmat va tarixiy xotirani eʼzozlash tamoyillarini yana-da mustahkamlashga xizmat qildi.