“O‘zbekiston va Tatariston: vaqt sinovidan o‘tgan” mavzusida qo‘shma arxiv hujjatlari ko‘rgazmasi o‘tkazilmoqda
2026-04-20 14:35:00 / Yangiliklar
“O‘zbekiston va Tatariston: vaqt sinovidan o‘tgan” mavzusida qo‘shma arxiv hujjatlari ko‘rgazmasi o‘tkazilmoqda
Mazkur ko‘rgazma O‘zbekiston va Tatariston o‘rtasidagi tarixiy, iqtisodiy va madaniy aloqalarning ko‘p asrlik ildizlari hamda bugungi kunda izchil rivojlanib borayotgan hamkorlikni yoritishga qaratilgan. Ekspozitsiyada ikki hudud o‘rtasidagi savdo-iqtisodiy aloqalar, ilm-fan, taʼlim va madaniyat sohalaridagi hamkorlikni aks ettiruvchi noyob arxiv hujjatlari, fotosuratlar va boshqa tarixiy materiallar namoyish etilmoqda.
Ko‘rgazmada Gulnara Zakariyevna Gabdraxmanova boshchiligidagi Tatariston Respublikasi arxivchilari delegatsiyasi ishtirok etmoqda.
Tadbir doirasida «O‘zarxiv» agentligi direktori U.Yusupov va Tatariston Respublikasi Arxiv ishi bo‘yicha Davlat qo‘mitasi raisi G.Gabdraxmanova OAV vakillariga intervyu berdilar.
Ko‘rgazma tashrif buyuruvchilarga O‘zbekiston va Tatariston xalqlari o‘rtasidagi o‘zaro ishonch, do‘stlik va strategik sheriklik munosabatlarining shakllanishi va rivojlanish bosqichlari haqida chuqur tasavvur beradi. Shuningdek, u zamonaviy sanoat va innovatsion hamkorlikning tarixiy ildizlarini ochib berishga xizmat qiladi.
Tadbir doirasida mutaxassislar, tarixchilar va keng jamoatchilik vakillari uchun ekskursiyalar tashkil etilib, arxiv materiallari yuzasidan batafsil maʼlumotlar taqdim etilmoqda.
Mazkur qo‘shma ko‘rgazma “INNOPROM. Markaziy Osiyo” platformasida nafaqat sanoat va iqtisodiy aloqalarni mustahkamlash, balki madaniy-gumanitar hamkorlikni yana-da rivojlantirish yo‘lida muhim ahamiyat kasb etadi.
Maʼlumot uchun: 2026-yil 20–22 aprel kunlari Toshkent shahridagi Central Asian Expo Uzbekistan (CAEx) ko‘rgazmalar majmuasida o‘tkazilayotgan “INNOPROM. Markaziy Osiyo” xalqaro sanoat ko‘rgazmasi doirasida “O‘zbekiston va Tatariston: vaqt sinovidan o‘tgan” mavzusidagi qo‘shma arxiv hujjatlari ko‘rgazmasi tashkil etildi.