O‘zbekiston Respublikasi Adliya vazirligi huzuridagi "O‘zarxiv" Agentligi

“Toshkent zilzilasi – xalqlararo birdamlik nuqtasi” mavzusida arxiv hujjatlari fotoko‘rgazmasi o‘tkazildi

Joriy yilning 17-aprel kuni Toshkent muzeyida O‘zbekistonda Shanxay hamkorlik tashkilotining Xalq diplomatiyasi markazi hamda O‘zbekiston Respublikasi Adliya vazirligi huzuridagi “O‘zarxiv” agentligi hamkorligida “Toshkent zilzilasi – xalqlararo birdamlik nuqtasi” mavzusida arxiv hujjatlari fotoko‘rgazmasi tashkil etildi.

Mazkur tadbirning asosiy maqsadi arxiv hujjatlari asosida xalqlararo do‘stlik, mehr-oqibat va insonparvarlik kabi umuminsoniy qadriyatlarni targ‘ib qilish, tarixiy xotirani asrash hamda ushbu maʼnaviy merosni keng jamoatchilikka yetkazishdan iborat.

Fotoko‘rgazmada davlat va jamoat tashkilotlari vakillari, arxiv va tarix sohasi mutaxassislari, OTM professor-o‘qituvchilari va talabalar, ommaviy axborot vositalari xodimlari hamda keng jamoatchilik vakillari ishtirok etdi.

1966-yil 26-aprel kuni sodir bo‘lgan Toshkent zilzilasining 60 yilligi munosabati bilan tashkil etilgan mazkur tadbirda, mamlakatimiz tarixidagi eng og‘ir sinovlardan biri sifatida qayd etilib, tabiiy ofat oqibatlarini bartaraf etish jarayonida namoyon bo‘lgan xalqlararo birdamlik, insonparvarlik va o‘zaro hamjihatlik anʼanalarini keng yoritishga qaratildi.

Maʼlumki, mazkur fojia oqibatida poytaxtda katta vayronagarchilik yuzaga kelgan bo‘lsa-da, ushbu sinov turli millat va xalqlarni yagona maqsad yo‘lida birlashtirdi. Sobiq ittifoqning turli respublikalaridan kelgan minglab insonlar Toshkentni tiklash ishlarida faol ishtirok etib, xalqlar o‘rtasidagi do‘stlik va hamjihatlikning yuksak namunasini namoyon etdilar.

Fotoko‘rgazma doirasida 1966-yilgi zilzila oqibatlari, vayronagarchilik ko‘lami, shaharni qayta qurish jarayonlari hamda turli xalqlar vakillarining Toshkentni tiklashdagi beqiyos hissasini aks ettiruvchi 60 dan ortiq arxiv fotosuratlar va hujjatlar namoyish etildi. Ushbu materiallar orqali Toshkent zilzilasi nafaqat tabiiy ofat, balki xalqlarni yaqinlashtirgan, insonlarni ezgulik va hamjihatlik g‘oyasi atrofida birlashtirgan muhim tarixiy voqea sifatida talqin etildi.

Tadbir doirasida so‘zga chiqqan maʼruzachilar fotoko‘rgazmaning ahamiyatiga alohida to‘xtalib, arxiv hujjatlari orqali tarixiy xotirani tiklash, yosh avlod qalbida vatanparvarlik va insonparvarlik tuyg‘ularini mustahkamlash muhimligini taʼkidladilar.

Jumladan, Markaz direktori Qobiljon Sobirov o‘z nutqida 1966-yilgi Toshkent zilzilasi nafaqat fojia, balki xalq diplomatiyasining yorqin namunasi ekanini qayd etib, turli millat va elat vakillarining hamjihatligi xalqlar o‘rtasidagi do‘stlik rishtalarini yana-da mustahkamlaganini taʼkidladi.

Shuningdek, “O‘zarxiv” agentligi direktori Ulug‘bek Yusupov arxiv hujjatlari xalq xotirasining ajralmas qismi ekanini taʼkidlab, bunday tadbirlar yoshlarni tarixiy voqealar bilan yaqindan tanishtirishda muhim ahamiyat kasb etishini qayd etdi.

G‘.O.Mavlonov nomidagi Seysmologiya instituti bosh ilmiy hodimi Sobitjon Maqsudov esa tabiiy ofatlar xavfini kamaytirish maqsadida zamonaviy shaharsozlik qoidalariga qatʼiy rioya qilish, binolarni seysmik bardoshli standartlar asosida qurish zarurligini taʼkidladi. Uning fikricha, Toshkent zilzilasi saboqlari bugungi qurilish amaliyoti uchun ham dolzarb ahamiyatga ega.

Tadbir ishtirokchilari Toshkentning qisqa muddatda qayta tiklangani xalqlar birdamligi va fidokorona mehnat samarasi ekanini alohida eʼtirof etdilar. Mazkur jarayon nafaqat shaharni qayta qurish, balki xalqlar o‘rtasidagi do‘stlik, hamjihatlik va o‘zaro ishonchni yana-da mustahkamlashga xizmat qildi.

Taʼkidlanganidek, bu kabi arxiv fotoko‘rgazmalar yosh avlodga tarixdan saboq olish, millatlararo totuvlik qadrini anglash hamda tabiiy ofatlarga qarshi tayyorgarlik madaniyatini shakllantirishda muhim maʼrifiy ahamiyatga ega.