O‘zbekiston Respublikasi Xalqaro “Oltin meros” xayriya jamoat fondi hamda O‘zbekiston Milliy arxivi o‘rtasida o‘zaro hamkorlik memorandumi imzolandi.
2026-02-25 15:00:00 / Yangiliklar
Joriy yilning 25 fevral kuni O‘zbekiston Milliy arxivida muhim madaniy-maʼrifiy tadbir bo‘lib o‘tdi. Unda O‘zbekiston Respublikasi Xalqaro “Oltin meros” xayriya jamoat fondi hamda O‘zbekiston Milliy arxivi o‘rtasida o‘zaro hamkorlik memorandumi imzolandi.
Mazkur memorandum ikki tashkilot o‘rtasida tarixiy-madaniy merosni asrash, arxiv hujjatlarini ilmiy tadqiq etish, nodir manbalarni aniqlash va keng jamoatchilikka yetkazish borasidagi hamkorlikni yana-da mustahkamlashga qaratilgan. Hujjat doirasida qo‘shma loyihalarni amalga oshirish, ilmiy-amaliy konferensiyalar tashkil etish, shuningdek, Shajarashunoslik va manbashunoslik yo‘nalishlarida tadqiqotlarni qo‘llab-quvvatlash rejalashtirilgan.
Ushbu tadbirda O‘zbekiston Xalqaro “Oltin meros” xayriya jamoat fondi raisi Amirqul Karimov, faxriy shajarashunos Asqar Abidov, mutaxassis dizayner nasabshunos grafikachi Nizomiddin Abrarov, manbashunos-shajarashunos Bahodirov Ilhom Ikromovich, tadqiqotchi-manbashunos Shahnozaxon Xo‘jayeva hamda arxiv xodimlari ishtirok etdilar.
Tadbir doirasida yana bir muhim voqea — “Oltin meros” xalqaro jamoat fondi “Shajarashunoslik va manbashunoslik” bo‘limi tadqiqotchi shajarashunosi, xalqaro PhD doktori Asqar Obidovning shaxsiy fondini O‘zbekiston Milliy arxiviga topshirish marosimi bo‘lib o‘tdi.
Mazkur shaxsiy fond tarkibiga ko‘p yillik ilmiy izlanishlar natijasida to‘plangan qo‘lyozmalar, shajara daraxtlari, tarixiy hujjatlar nusxalari, ilmiy maqolalar va boshqa qimmatli manbalar kiradi. Ushbu materiallar milliy tariximizni chuqur o‘rganish, ajdodlar merosini tiklash va kelgusi avlodlarga yetkazishda muhim manba bo‘lib xizmat qiladi.
Tadbirning eng tantanali lahzalaridan biri — xalqaro PhD doktori, tajribali shajarashunos olim Asqar Obidovga agentlikning “Soha iftixori” ko‘krak nishonini topshirish marosimi bo‘ldi. Mazkur yuksak eʼtirof Asqar Obidovning ko‘p yillik samarali ilmiy faoliyati, Shajarashunoslik va manbashunoslik yo‘nalishida olib borgan chuqur tadqiqotlari, tarixiy manbalarni aniqlash, tizimlashtirish va ilmiy muomalaga kiritish borasidagi fidokorona mehnatining munosib bahosi sifatida topshirildi. Tadbirda so‘zga chiqqanlar olimning milliy merosimizni asrash, ajdodlar xotirasini tiklash hamda yosh avlodni tarixiy ildizlariga hurmat ruhida tarbiyalash yo‘lidagi xizmatlarini alohida taʼkidladilar. Qayd etilishicha, uning ilmiy izlanishlari nafaqat mamlakatimizda, balki xalqaro miqyosda ham eʼtirof etilgan bo‘lib, ko‘plab tadqiqotchilar uchun muhim manba vazifasini o‘tab kelmoqda.
Tadbir ishtirokchilari mazkur hamkorlik mamlakatimizda arxiv sohasi va Shajarashunoslik yo‘nalishining rivojlanishiga yangi surʼat bag‘ishlashini taʼkidladilar.
O‘zbekiston Milliy arxivi hamda “Oltin meros” xalqaro xayriya jamoat fondi o‘rtasidagi ushbu hamkorlik milliy merosimizni asrash va targ‘ib etish yo‘lida muhim qadam bo‘lib xizmat qiladi.