O‘zbekiston Respublikasi Adliya vazirligi huzuridagi "O‘zarxiv" Agentligi

Konstitutsiyaviy sud faoliyatini raqamlashtirishda “O‘zarxiv” agentligi tajribasi o‘rganilmoqda

2026-yil 18-fevral kuni O‘zbekiston Respublikasi Konstitutsiyaviy sudi faoliyatini raqamlashtirish bo‘yicha ishchi guruh aʼzolari “O‘zarxiv” agentligida mehmon bo‘lib, agentlikning zamonaviy axborot kommunikatsiya tizimlari va raqamlashtirish jarayonlari bilan yaqindan tanishdilar.

“O‘zarxiv” agentligi direktori Ulug‘bek Yusupov shaxsan mehmonlarni kutib olib, agentlikning faoliyati, joriy etilgan elektron hujjat aylanishi tizimlari va arxiv hujjatlarini raqamlashtirish tajribasi haqida batafsil maʼlumot berdi.

Uchrashuv davomida sud va davlat arxivi o‘rtasida hujjatlarni olishga so‘rov yuborish hamda arxivdan hujjatlarni olish jarayonida elektron axborot almashinuvini taʼminlash masalalari ham atroflicha muhokama qilindi. Ishchi guruh aʼzolari “O‘zarxiv” ning samarali elektron tizimlari bilan tanishib, ularning sud faoliyatini raqamlashtirishda qo‘llanish imkoniyatlarini o‘rgandilar.

Eʼtiborlisi, bu tashrif O‘zbekiston Respublikasi Prezidentining 2025-yil 18-dekabrdagi PF-253-sonli Farmoni bilan belgilangan vazifalarni amalga oshirish doirasida bo‘lib o‘tdi. Farmon Konstitutsiyaviy sud faoliyatini yana-da takomillashtirish va zamonaviy raqamli texnologiyalarni joriy etishni nazarda tutadi.

Ishchi guruhning “O‘zarxiv” agentligi tajribasini o‘rganishi sud faoliyatini raqamlashtirish jarayonida muhim qadam bo‘lib, bu orqali sud hujjatlarini elektron tarzda almashish va arxivlashtirish tizimlari yana-da samarali va zamonaviylashtiriladi.