“O‘zarxiv” agentligi direktori Ulug‘bek Yusupovning korrupsiyaga qarshi kurashish bo‘yicha aholi va arxiv tizimi xodimlariga MUROJAATI
2025-12-30 16:00:00 / Rahbariyatning bayonotlari va nutqlari
“O‘zarxiv” agentligi direktori Ulug‘bek Yusupovning
korrupsiyaga qarshi kurashish bo‘yicha
aholi va arxiv tizimi xodimlariga
MUROJAATI
Hurmatli yurtdoshlar!
Aziz arxiv tizimi xodimlari!
Bugungi kunda mamlakatimizda olib borilayotgan keng ko‘lamli islohotlar samarasi, avvalo, davlat organlari va tashkilotlarida qonuniylik, shaffoflik va halollik tamoyillarining to‘laqonli qaror topishiga bevosita bog‘liqdir. Shu ma’noda korrupsiyaga qarshi murosasiz kurashish davlat siyosatining ustuvor yo‘nalishlaridan biri hisoblanadi.
Hurmatli Prezidentimiz Oliy Majlis va O‘zbekiston xalqiga Murojaatnomalarida korrupsiyaning jamiyat va davlat taraqqiyoti uchun naqadar xavfli illat ekanini alohida ta’kidlab, quyidagi so‘zlarni aytdilar:
“Korrupsiya - davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid. Korrupsiyaga yo‘l qo‘yish esa islohotlarimizga xiyonatdir! Bu illatga qarshi kurashish bo‘yicha 2026-yilda “favqulodda holat” e’lon qilamiz”.
Davlatimiz rahbari tomonidan belgilangan ushbu qat’iy va prinsipial pozitsiya barchamiz uchun aniq dasturilamal bo‘lishi lozim. Shu munosabat bilan barcha idora va tashkilotlarda, jumladan arxiv tizimida ham komplayens va korrupsiyaga qarshi ichki nazoratni kuchaytirish, mas’ul rahbar o‘rinbosarlari hamda nazorat mexanizmlarini joriy etish belgilandi.
Bu ogohlantirish har bir rahbar va har bir xodimga birdek taalluqlidir. Arxiv sohasida ishlayotgan har bir rahbar va mutaxassis o‘z faoliyatida qonunga, kasbiy etika qoidalariga va vijdoniga tayanishi shart.
“O‘zarxiv” agentligi korrupsiyaga qarshi kurashishda namunali organ bo‘lishi uchun barcha kuch va imkoniyatlarni safarbar etishimiz lozim. Biz uchun halollik - shunchaki shior emas, balki kundalik ish faoliyatimizni belgilab beruvchi asosiy mezondir. Shu ma’noda “Halollik vaksinasi” har bir xodimning ongi va qalbida mustahkam qaror topishi, korrupsiyaga nisbatan mutlaqo murosasiz immunitet shakllanishi zarur.
Arxiv sohasida shaffoflikni ta’minlash, budjet mablag‘laridan maqsadli va samarali foydalanish, xizmat vakolatlarini suiiste’mol qilish holatlarining oldini olish - bizning ustuvor vazifamizdir. Komplayens xizmati faoliyatiga to‘sqinlik qilish yoki noqonuniy harakatlarga ko‘z yumish korrupsiyaga sheriklik sifatida baholanishini har kim aniq anglab yetishi kerak.
Hurmatli hamkasblar!
Biz arxiv tizimida halol mehnat, pok niyat va yuksak mas’uliyat muhitini yarata olsak, xalqimizning davlat organlariga bo‘lgan ishonchi yanada mustahkamlanadi. Korrupsiyaga qarshi kurash - bu faqat nazorat emas, balki ong, tarbiya va shaxsiy namuna masalasidir.
Barchangizni qonun ustuvorligiga sodiq, halol va fidoyi bo‘lishga, “O‘zarxiv” agentligi va davlat arxivlarini korrupsiyadan xoli, ochiq va ishonchli tizimga aylantirish yo‘lida birgalikda qat’iyat bilan harakat qilishga chaqiraman.
Faqat shu yo‘l bilan biz davlatimiz rahbari oldimizga qo‘ygan yuksak ishonchni oqlaymiz va kelajak avlod oldida yuzimiz yorug‘ bo‘ladi.