O‘zbekiston Respublikasi Adliya vazirligi huzuridagi "O‘zarxiv" Agentligi

“O‘zarxiv” agentligida korrupsiyaga qarshi kurashish masalalari muhokama qilindi

Bugun “O‘zarxiv” agentligida korrupsiyaga qarshi kurashish mavzusiga bag‘ishlangan davra suhbati bo‘lib o‘tdi. Tadbir davlat arxivlari tizimida shaffoflikni taʼminlash, korrupsiyaviy holatlarni oldini olish va ichki nazorat mexanizmlarini yana-da kuchaytirish masalalariga bag‘ishlandi. Davra suhbatida “O‘zarxiv” agentligi direktori Yusupov Ulug‘bek Mirtolibovich hamda Adliya vazirligi tizimidagi korrupsiyaga qarshi kurashish bo‘limi boshlig‘i Shadiyev Umid Akbarovich asosiy maʼruzalar bilan ishtirok etdilar.

Tadbirni ochib bergan Ulug‘bek Yusupov o‘z so‘zida mamlakatimizda korrupsiyaga qarshi kurash davlat siyosati darajasiga ko‘tarilganini, bu borada Prezident Shavkat Mirziyoyev tomonidan qatʼiy va prinsipial pozitsiya bildirilayotganini taʼkidladi. U Prezidentning Oliy Majlisga va ko‘p millatli xalqimizga yo‘llagan Murojaatnomasidagi korrupsiyaga qarshi kurashga oid quyidagi fikrlarni keltirdi: “Korrupsiya – davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid. Korrupsiyaga YO‘l qo‘yish esa islohotlarimizga xiyonatdir! Bu illatga qarshi kurashish bo‘yicha 2026-yilda ‘favqulodda holat‘ eʼlon qilamiz”. Shuningdek, barcha idoralarda komplayens va korrupsiyaga qarshi ichki nazoratga masʼul o‘rinbosar lavozimi joriy etilishi, Hisob palatasi vakillari faoliyati yo‘lga qo‘yilishi, bu rahbarlar tizimdagi nopok shaxslarni aniqlash, byudjet mablag‘larining talon-toroj qilinishi va mansab vakolatlarini suiisteʼmol qilish holatlarini oldini olishda taʼsirchan nazorat o‘rnatishi qayd etildi. Prezidentning “Lavozimim, unvonim bor, menga hech kim tegmaydi, deganlar adashadi. Qonun oldida hamma teng” degan qatʼiy ogohlantirishini keltirar ekan, Ulug‘bek Yusupov endi korrupsiyaga yo‘l qo‘ygan har qanday rahbar va xodimga tizimda o‘rin yo‘qligini alohida taʼkidladi.

Shuningdek, davra suhbatida so‘zga chiqqan Adliya vazirligi tizimidagi korrupsiyaga qarshi kurashish bo‘limi boshlig‘i Shadiyev Umid Akbarovich “O‘zarxiv” agentligi tizimida so‘nggi besh yil davomida aniqlangan korrupsiya alomatlari mavjud jinoyatlar statistikasini tahlil qilib berdi. U o‘z maʼruzasida korrupsiyaning kelib chiqish sabablari, xavf omillari, ularni bartaraf etishda profilaktikaning ahamiyati haqida to‘xtalib o‘tdi. Shu bilan birga, korrupsiyani oldini olish bo‘yicha amalga oshirilishi lozim bo‘lgan chora-tadbirlar, raqamlashtirish jarayonlarini tezlashtirish, ichki nazoratni kuchaytirish, xizmat faoliyatida ochiqlik va javobgarlikni taʼminlash, xodimlarning huquqiy ongi va masʼuliyatini oshirish muhim ekanini taʼkidladi.

Tadbirda Qoraqalpog‘iston Respublikasi, Toshkent shahri va barcha viloyatlar arxiv ishi hududiy boshqarmalari boshliqlari, viloyat, shahar va tuman davlat arxivlari, O‘zbekiston Milliy arxivlari rahbar va xodimlari ishtirok etdilar. Davra suhbati ishtirokchilari korrupsiyaga qarshi kurashish faqatgina nazorat yoki jazo bilan emas, balki tizimli yondashuv, halollik tamoyillarini hayotga tatbiq etish orqali samarali bo‘lishini taʼkidlab, bu yo‘nalishdagi ishlar izchil davom ettirilishi lozimligiga urg‘u berdilar.

Tadbir davomida Raqobatni cheklovchi talablar bo‘yicha o‘quv seminari tashkil etildi va mazkur davra suhbatda xodimlar savol va javoblar qilinib bilim darajalari o‘rganildi.