“Shajara” axborot tizimi bo‘yicha ishlar olib borilmoqda
2025-12-19 16:05:00 / Yangiliklar
“Shajara” axborot tizimi bo‘yicha ishlar olib borilmoqda
O‘zbekiston Respublikasi Prezidentining 2025-yil 24-noyabrdagi PF–228-son Farmoniga muvofiq, 2026-yil 1-sentabrdan “Shajara” axborot tizimi ishga tushirilishi belgilandi. Bugun ushbu tizimni ishlab chiqish bo‘yicha navbatdagi ishchi yig‘ilishi bo‘lib o‘tdi.
Yig‘ilishda “O‘zarxiv” agentligi direktori Ulug‘bek Yusupov, shajarashunos olimlar, tarixchilar, agentlik xodimlari hamda Adliya vazirligi huzuridagi Axborot-kommunikatsiya texnologiyalarini rivojlantirish markazi mutaxassislari ishtirok etdi. Shuningdek, yig‘ilishda Do‘stmatov Muqaddis Razoqovich — “Oltin meros” xalqaro xayriya fondi ijrochi direktori, “Oltin meros” xalqaro jamoat fondining “Shajarashunoslik va manbashunoslik” bo‘limi tadqiqotchi shajarashunosi, xalqaro PhD doktori, faxriy shajarashunos Asqar Abidov, tadqiqotchilar Artur Tlegenov va Furqat Yakvalxodjaev, O‘zbekiston Milliy arxivi katta ilmiy xodimi Mirzayev Nasriddin, shuningdek Akmal Pirimqulov hamda “Oltin meros” xalqaro xayriya fondi xodimi Nizomiddin Abrorov qatnashdilar.
Yig‘ilish davomida shajarani arxiv hujjatlari asosida tuzishning o‘ziga xos xususiyatlari, arxiv hujjatlarini raqamlashtirishda e’tibor qaratilishi kerak bo‘lgan jihatlar hamda axborot tizimi aholi uchun maksimal darajada qulay va ishonchli bo‘lishi uchun zarur chora-tadbirlar muhokama qilindi.
Yaratiluvchi “Shajara” axborot tizimining asosiy maqsadi fuqarolarga o‘z oilaviy shajaralari va etnik ildizlari haqidagi ma’lumotlarni elektron platforma orqali qulay, tez va ishonchli tarzda taqdim etishdan iborat. Tizimning maqomi va funksiyalari jahondagi FamilySearch, MyHeritage kabi yirik genealogik servislar hamda Tataristondagi “Yadkyar” portali tajribasiga muvofiq tashkil etilishi rejalashtirilmoqda.
“Shajara” axborot tizimi ishga tushirilganidan so‘ng, har bir fuqaro o‘z oila tarixini va ildizlarini oson va samarali tarzda o‘rganish imkoniyatiga ega bo‘ladi.