TA'LIM TIZIMI HAQIDA MA'LUMOT
Maktabgacha ta’lim
Viloyatda jami 4 047 ta maktabgacha ta’lim tashkiloti faoliyat yuritmoqda. Shundan 558 tasi davlat, 15 tasi xususiy, 259 tasi davlat-xususiy sheriklik asosidagi hamda 3 215 tasi oilaviy nodavlat maktabgacha ta’lim tashkilotlarini tashkil etadi.
Mazkur ta’lim tashkilotlariga hududdagi 3–7 yoshli 307 822 nafar bolaning 263 771 nafari, ya’ni 85,7 foizi qamrab olingan. 2026-yil yakuniga qadar viloyatda maktabgacha ta’lim bilan qamrov darajasini 90 foizga yetkazish rejalashtirilgan.
Ushbu maqsadga erishish uchun quyidagi ishlarni amalga oshirish rejalashtirilmoqda:
– 7 ta maktabgacha ta’lim tashkilotida, jumladan, 1 ta yangi qurilish va 6 ta rekonstruksiya loyihasi doirasida Investitsiya dasturi asosida qurilish-ta’mirlash ishlari amalga oshiriladi;
– 820 o‘rinli 8 ta yirik loyihali davlat-xususiy sheriklik asosidagi hamda 6 711 o‘rinli 113 ta oilaviy nodavlat maktabgacha ta’lim tashkiloti tashkil etiladi;
– yil yakuniga qadar 3–7 yoshli bolalarni maktabgacha ta’lim bilan qamrab olish ko‘rsatkichi 250 044 nafarga, ya’ni 90 foizga yetkaziladi.
Maktab ta’limi
Viloyatda jami 832 ta maktab faoliyat yuritmoqda. Shundan 762 tasi umumta’lim maktabi, 18 tasi ixtisoslashtirilgan maktab, 1 tasi Prezident maktabi, 1 tasi ijod maktabi va 50 tasi nodavlat maktablardan iborat.
Mazkur ta’lim muassasalarida jami 626 741 nafar o‘quvchiga 44 806 nafar o‘qituvchi ta’lim-tarbiya berib kelmoqda.
2026-yil Investitsiya dasturi doirasida Andijon viloyatidagi 39 ta ta’lim obyektida qurilish-ta’mirlash ishlari amalga oshirildi. Shundan 28 tasi umumta’lim maktablari bo‘lib, ulardan 1 tasida yangi qurilish, 24 tasida rekonstruksiya va 3 tasida mukammal ta’mirlash ishlari bajarildi. Shuningdek, 11 ta maktabgacha ta’lim tashkilotida, jumladan, 1 ta yangi qurilish, 8 ta rekonstruksiya va 2 ta mukammal ta’mirlash ishlari amalga oshirildi.
Mazkur ishlarni amalga oshirish uchun budjet mablag‘laridan 351,9 milliard so‘m yo‘naltirildi.
“Tashabbusli budjet” loyihasining 2026-yil 1-mavsumi doirasida viloyatda 70 ta ta’lim tashkilotining loyiha takliflari g‘olib deb topildi. Shundan 68 tasi umumta’lim maktabi, 2 tasi maktabgacha ta’lim tashkilotidir. Mazkur loyihalarni amalga oshirish uchun budjetdan 98,1 milliard so‘m mablag‘ yo‘naltirildi.
Shuningdek, mahalliy budjet mablag‘lari hisobidan 42 ta maktab hududi qo‘rg‘on-devor bilan o‘raldi, 80 ta maktabda yangi hojatxonalar qurildi hamda mavjudlari ta’mirlandi. Ta’lim muassasalariga 155 komplekt o‘quv jihozlari, 7 turdagi 5 355 dona musiqa asboblari hamda 5 turdagi 32 130 dona sport anjomlari yetkazib berildi.
2026-yilda 29 ta umumta’lim maktabida ikkinchi xorijiy tilni o‘qitish amaliyoti yo‘lga qo‘yildi. Bugungi kunda mazkur maktablarda 864 nafar 10–11-sinf o‘quvchisiga ikkinchi xorijiy til sifatida ingliz, nemis, fransuz, koreys va xitoy tillari o‘qitilmoqda.
2025/2026-o‘quv yilida viloyatda 42 298 nafar o‘quvchi 11-sinfni tamomladi. Ularning 28 590 nafari, ya’ni 68 foizi oliy ta’lim muassasalariga o‘qishga qabul qilindi. Mazkur ko‘rsatkich 2024/2025-o‘quv yiliga nisbatan 3 foizga oshgan.
2026/2027-o‘quv yilidan boshlab yangi baholash tizimiga yana 113 ta maktab qo‘shildi. Natijada mazkur tizim asosida faoliyat yuritayotgan maktablar soni 321 taga yetkazildi.
2027-yilda amalga oshiriladigan ustuvor vazifalar
– 7 ta maktabgacha ta’lim tashkilotida, jumladan, 1 ta yangi qurilish va 6 ta rekonstruksiya loyihasi doirasida Investitsiya dasturi asosida qurilish-ta’mirlash ishlari amalga oshiriladi;
– 820 o‘rinli 8 ta yirik loyihali davlat-xususiy sheriklik asosidagi hamda 6 711 o‘rinli 113 ta oilaviy nodavlat maktabgacha ta’lim tashkiloti tashkil etiladi;
– yil yakuniga qadar 3–7 yoshli bolalarni maktabgacha ta’lim bilan qamrab olish darajasi 250 044 nafarga, ya’ni 90 foizga yetkaziladi.
Dual ta’lim
Bugungi kunda viloyatda dual ta’lim bilan qamrov darajasi 84,3 foizni tashkil etmoqda.
Hozirda viloyatdagi 59 ta texnikumning bitiruvchi bosqichida tahsil olayotgan 22 524 nafar o‘quvchidan 19 010 nafari, ya’ni 84,3 foizi 1 052 ta korxona va tashkilotga biriktirilgan holda “Ta’lim va mehnat bir maskanda” loyihasi asosida dual ta’lim shaklida tahsil olmoqda.
Shuningdek, ayni paytda 11 121 nafar, ya’ni 49,4 foiz o‘quvchi bir vaqtning o‘zida ham ta’lim olib, ham mehnat faoliyati bilan shug‘ullanmoqda. Ularning oylik ish haqi 1,5 million so‘mdan 4,5 million so‘mgacha bo‘lgan miqdorni tashkil etmoqda.
Kasbiy ta'lim
Texnikumlarda xalqaro ta’lim dasturlarini joriy etish bo‘yicha ishlab chiqilgan mezonlarga muvofiq moddiy-texnik baza va infratuzilmaning holati, pedagogik kadrlar salohiyati, ta’lim yo‘nalishlarining ustuvorligi va dolzarbligi, ish beruvchilar hamda ijtimoiy hamkorlar bilan aloqalar, ta’lim sifatini ta’minlash va boshqaruv tizimini shakllantirish kabi muhim yo‘nalishlarga asosiy e’tibor qaratilmoqda.
Olib borilgan izlanishlar va tayyorgarlik ishlari natijasida 2025/2026-o‘quv yilidan boshlab Asaka tuman 4-son texnikumida Buyuk Britaniyaning “Pearson” ta’lim tashkiloti bilan hamkorlikda “Metallarga qayta ishlov berish”, “Elektromontyor”, “Mashinasozlik texnologiyasi” va “Dasturiy injiniring” kasblari bo‘yicha 100 nafar o‘quvchini, Andijon Abu Ali ibn Sino nomidagi Jamoat salomatligi texnikumida esa Shveysariyaning “Globogate” ta’lim markazi bilan hamkorlikda “Hamshiralik ishi” hamda “Davolash ishi” yo‘nalishlari bo‘yicha 50 nafar o‘quvchini xalqaro ta’lim dasturlari asosida o‘qitish yo‘lga qo‘yildi.
Xalqaro ta’lim dasturlarini joriy etish borasidagi ishlarni yanada rivojlantirish maqsadida izlanish olib borayotgan Andijon shahar 2-son texnikumi, Andijon shahar 7-son texnikumi, Andijon tuman 3-son texnikumi hamda Paxtaobod tuman 1- va 2-son texnikumlari direktorlaridan iborat viloyat delegatsiyasi joriy yilning aprel oyida Germaniyada xizmat safarida bo‘ldi. Tashrif davomida “ZAW Leipzig” GmbH ta’lim tashkiloti bilan o‘zaro hamkorlik shartnomalari imzolandi.
2026/2027-o‘quv yilidan boshlab viloyatdagi 7 ta texnikumda — Asaka tuman 4-son texnikumi, Andijon shahar 4-son texnikumi, Andijon shahar 7-son texnikumi, Andijon tuman 3-son texnikumi, Paxtaobod tuman 2-son texnikumi, Andijon Abu Ali ibn Sino nomidagi Jamoat salomatligi texnikumi hamda Qo‘rg‘ontepa Abu Ali ibn Sino nomidagi Jamoat salomatligi texnikumida 10 ta kasb va mutaxassislik bo‘yicha jami 570 nafar o‘quvchini Buyuk Britaniyaning “Pearson”, Shveysariyaning “Globogate” hamda Germaniyaning “ZAW Leipzig” GmbH tashkilotlari bilan hamkorlikda qo‘shma ta’lim dasturlari asosida tayyorlash boshlanadi.
Shu tariqa, ayni paytda xalqaro ta’lim dasturlari asosida tahsil olayotgan 151 nafar yosh bilan birgalikda xorijiy hamkorlik yo‘lga qo‘yilgan texnikumlardagi o‘quvchilar soni 721 nafarga yetadi.
Bundan tashqari, Janubiy Koreyaning CHEJU HALLA UNIVERSITY (CHU) bilan hamkorlik aloqalarini yo‘lga qo‘yish bo‘yicha olib borilayotgan ishlar yakunlanish arafasida.
2026-yil yanvar oyida o‘tkazilgan uchrashuvda o‘zaro almashinuv va hamkorlik doirasida Andijon shahrida CHU Global Center tashkil etilgani va uning faoliyati yo‘lga qo‘yilgani muhim qadam bo‘ldi.
Mazkur markazda koreys tili kurslarini tashkil etish, o‘quvchilarni ushbu kurslarga jalb qilish, tinglovchilarni shakllantirish hamda kurslar faoliyatini yo‘lga qo‘yish bo‘yicha tegishli tashkilotlar bilan hamkorlikda tizimli ishlar olib borilmoqda. Shuningdek, yaqin istiqbolda malakali kadrlar tayyorlash maqsadida qo‘shma ta’lim dasturlarini ishlab chiqish jarayoni davom etmoqda.
Shuningdek, 2026-yil 21–22-aprel kunlari Andijon shahar 7-son texnikumida Germaniyaning “Papenburg” xalqaro ta’lim markazining taqdimot marosimi o‘tkazildi. Tadbir doirasida Andijon viloyati Kasbiy ta’lim boshqarmasi hamda “Papenburg” xalqaro ta’lim markazi o‘rtasida kadrlar tayyorlash bo‘yicha hamkorlikni yanada rivojlantirish to‘g‘risida memorandum imzolandi.
2026–2027-yillar davomida xalqaro ta’lim dasturlari joriy etilgan texnikumlar sonini 20 taga yetkazish rejalashtirilgan. Ushbu maqsadga erishish uchun mavjud imkoniyatlardan samarali foydalanish va belgilangan vazifalarni izchil amalga oshirishga alohida e’tibor qaratiladi.
