Andijon vilоyati hоkimligi

Bugungi kunda yurtimizda pishiqchilik pallasi. Bozorlarimiz mirishkor dehqonlar, bog‘bonlar yetishtirgan mahsulotlar bilan fayzli, barakali. daladan keltirilgan poliz, sabzavot mahsulotlari, ko‘katlar, sarhil mevalar ko‘zni quvontiradi. beixtiyor mana shunday jannatmonand yurtda tug‘ilganingga shukrona keltirasan.

Shahrixon dehqon bozori doimo gavjum. Mahalliy aholi, qolaversa qo‘shni tumanlardan ham xaridorlar keladi. Sifatli, didlariga mos mahsulotlarni sotib olib, qaytadilar. Ayni kunda 150 nafardan ziyod tadbirkor aholiga xizmat ko‘rsatmoqda. 

- Yurtimizda biz uchun keng imkoniyatlar yaratilmoqda, - deydi tadbirkor Ahmadjon Mo‘minov. - Ulardan oqilona foydalanib, faoliyatimizni yanada rivojlantiryapmiz. Bugungi kun talablari darajasida ish tashkil etib, el duosini olishga intilyapmiz.  Bizga ham, xaridorlarga ham yaxshi sharoitlar mavjud.

Mana shunday fikrlarni ko‘plab tadbirkorlardan, doimiy kelib ketuvchilardan ham eshitdik. 

Maskanda katta pavilon, 100 dan ziyod turg‘un savdo do‘koni faoliyat olib boradi. Natijada 70 nafar ishsizning doimiy bandligi ta’minlangan. Pishiqchilik sabab dehqonchilik mahsulotlari ko‘paygan. Ularni joylashtirish masalasiga ham alohida e’tibor qaratilyapti.

Har bir dehqon uchun maxsus savdo rastalari tashkil etildi. Ehtiyojga qarab ularni kengaytirish rejalari ham tayyorlab qo‘yilgan. Bozor to‘kinlik, farovonlik ramzi bo‘lishi bilan birga xalqimiz turmush tarzining belgisidir. Undagi qadimiy savdo-sotiq an’analari, urf-odatlari o‘ziga xosligi bilan ajralib turadi. Eng asosiysi halollik, birovning haqqiga hiyonat qilmaslik, o‘zaro hurmat, eng yaxshilarini ilinish kabi fazilatlar hanuzgacha yashab kelayotgani quvonarli.