Andijon shahrida daraxtlar va yashil hududlarni changdan tozalash ishlari olib borilmoqda
2026-11-01 15:45:00 / Yangiliklar
Joriy yilgi kuz mavsumining haddan tashqari quruq va kamyog‘in kelishi ortidan, Andijon shahrida ekologik holatni yaxshilash va qulay mikroiqlimni saqlashga qaratilgan keng ko‘lamli tadbirlarga kirishildi.
Xususan, Andijon viloyati hokimligi, viloyat Favqulodda vaziyatlar boshqarmasi, shahar Obodonlashtirish boshqarmasi hamda viloyat Yo‘l harakati xavfsizligi boshqarmasi hamkorligida markaziy ko‘chalardagi daraxtlar va yashil maydonlarni changdan tozalash hamda yuvish ishlari tizimli ravishda tashkil etilmoqda.
Tadbirlar davomida maxsus texnikalar jalb etilib, daraxtlarning shox-shabbalari o‘rnashib qolgan chang qatlamidan ehtiyotkorlik bilan tozalanmoqda hamda shahar hududining havo harorati yuqori bo‘lgan qismlarida qo‘shimcha namlantirish ishlari olib borilmoqda.
Ushbu chora-tadbirlar tabiiy yog‘ingarchilik o‘rnini to‘liq bosa olmasa-da, atmosfera havosining musaffoligini ta’minlash va aholi uchun sog‘lom hamda qulay atrof-muhit sharoitini yaratishda muhim ahamiyat kasb etadi.