Andijon viloyati delegatsiyasi Janubiy Koreyaning «U&K Global Co., Ltd.» va «MODEUN ELEVATOR CO., LTD.» kompaniyalari vakillari bilan uchrashuv o‘tkazdi. Unda viloyatda zamonaviy liftsozlik sanoatini yo‘lga qo‘yish, xorijiy investitsiyalarni jalb etish hamda yuqori qo‘shilgan qiymatga ega mahsulotlar ishlab chiqarishni tashkil etish masalalari muhokama qilindi.

Muzokaralarning asosiy mavzusi umumiy qiymati 200 million AQSh dollariga teng bo‘lgan «Andijon–Koreya lift klasteri»ni tashkil etish loyihasi bo‘ldi. Mazkur tashabbus doirasida zamonaviy liftlar, eskalatorlar va ularning butlovchi qismlarini ishlab chiqarishni yo‘lga qo‘yish rejalashtirilgan.

Loyihaning muhim yo‘nalishlaridan biri ishlab chiqarish jarayonlarini mahalliylashtirishdan iborat. Xususan, mahalliylashtirish darajasini kamida 70 foizga yetkazish ko‘zda tutilmoqda. Bu esa zarur butlovchi qismlarni mahalliy korxonalarda ishlab chiqarish, import o‘rnini bosuvchi mahsulotlar ulushini oshirish hamda sanoat kooperatsiyasini rivojlantirish uchun zamin yaratishi mumkin.

Loyihaning amalga oshirilishi Andijonda mashinasozlik va sanoat ishlab chiqarishini yangi bosqichga olib chiqish, zamonaviy texnologiyalar hamda xorijiy tajribani mahalliy ishlab chiqarishga joriy etish, shuningdek, yangi ish o‘rinlarini yaratishga xizmat qilishi kutilmoqda.

Uchrashuv davomida loyihaning ishlab chiqarish imkoniyatlari, investitsiyalarni jalb etish hamda hamkorlikni amaliy bosqichga olib chiqish bilan bog‘liq masalalar ko‘rib chiqildi.

Tomonlar o‘rtasidagi hamkorlikning ushbu yo‘nalishda rivojlanishi Andijon viloyatining sanoat salohiyatini kengaytirish va hududda zamonaviy liftsozlik tarmog‘ini shakllantirishga xizmat qilishi kutilmoqda.