Bobur shahridagi “Vatanparvar” bog‘ida “Jasorat maktablari”da tahsil olayotgan o‘quvchilarning tantanali va’da berish marosimi bo‘lib o‘tdi
2026-10-16 12:35:00 / Yangiliklar
Prezidentimiz tashabbusi bilan mamlakatimizda yosh avlodni harbiy-vatanparvarlik ruhida tarbiyalash, ularning milliy va umuminsoniy qadriyatlarga hurmatini oshirish, ma’naviy-axloqiy fazilatlarini yuksaltirishga alohida e’tibor qaratilmoqda. Shuningdek, o‘quvchilarda harbiy xizmatni o‘tash uchun zarur bo‘lgan dastlabki bilim va ko‘nikmalarni shakllantirish, ularni oliy harbiy hamda harbiylashtirilgan ta’lim muassasalariga tayyorlash, Vatanga sadoqat bilan xizmat qiladigan jasur yoshlarni kamol toptirish maqsadida umumta’lim maktablarida “Jasorat maktabi” sinflari tashkil etilgan.
Ayni paytda Andijon viloyatining tuman va shaharlaridagi 16 ta maktabda faoliyat yuritayotgan “Jasorat maktabi” sinflariga joriy o‘quv yilida 416 nafar o‘quvchi qabul qilindi. Ularning tantanali va’da berish marosimida ustozlar, ota-onalar, Maktabgacha va maktab ta’limi boshqarmasi, Qurolli kuchlar tuzilmalari vakillari hamda keng jamoatchilik ishtirok etdi.
Tadbirda so‘zga chiqqanlar ushbu qutlug‘ marosim bilan tabriklab, ularga kelgusida yurtimiz taraqqiyoti, xalqimiz tinchligi va farovonligini ta’minlashga munosib hissa qo‘shadigan bilimli, salohiyatli va vatanparvar kadrlar bo‘lib yetishishlarini tiladilar.
Marosim davomida o‘quvchilar “Jasorat maktablari”da belgilangan tartib-intizomga qat’iy rioya qilish, puxta bilim olish, doimo ilg‘or, faol va fidoyi bo‘lishga tantanali ravishda va’da berdilar.