Marhamat tumanida aholiga ko‘rsatilayotgan tibbiy xizmatlar sifatini oshirish, sog‘liqni saqlash muassasalarining moddiy-texnik bazasini mustahkamlash hamda zamonaviy tibbiy xizmatlar uchun zarur shart-sharoitlarni yaratish borasida izchil ishlar amalga oshirilmoqda.

Ana shunday sa’y-harakatlar doirasida Marhamat tumani Tibbiyot birlashmasi tarkibidagi 40 o‘rinli yuqumli kasalliklar bo‘limi binosi rekonstruksiya qilinib, foydalanishga topshirildi.

Muassasaning ochilish marosimida tuman hokimligi vakillari, nuroniylar, faollar hamda sog‘liqni saqlash tizimi xodimlari ishtirok etdi.

Tadbir davomida amalga oshirilgan bunyodkorlik ishlari, yaratilgan qulayliklar va tibbiyot muassasasining aholi salomatligini muhofaza qilishdagi ahamiyatiga alohida e’tibor qaratildi.

Mazkur loyiha uchun 6 milliard 400 million so‘m mablag‘ yo‘naltirilishi belgilangan. Rekonstruksiya ishlari natijasida bo‘limning moddiy-texnik bazasi yaxshilanib, bemorlar va tibbiyot xodimlari uchun qulay shart-sharoitlar yaratildi.

Shuningdek, bo‘lim faoliyatini zamonaviy talablar asosida tashkil etish, kasalliklarni o‘z vaqtida aniqlash, samarali davolash hamda ularning tarqalishining oldini olish imkoniyatlarini kengaytirishga xizmat qiladi.

Mazkur tibbiyot muassasasining foydalanishga topshirilishi tumanda sog‘liqni saqlash tizimini yanada rivojlantirish, tibbiy xizmatlar sifatini oshirish va aholi salomatligini muhofaza qilish yo‘lidagi muhim qadamlardan biri bo‘ldi.