“Qishloq xo‘jaligi texnikalari yarmarkasi – 2026” ko‘rgazma-yarmarkasi o‘tkazildi
2026-09-21 10:35:00 / Yangiliklar
Andijon qishloq xo‘jaligi va agrotexnologiyalar institutida “AgroTech Klaster” korxonasi hamda Agrobank hamkorligida “Qishloq xo‘jaligi texnikalari yarmarkasi – 2026” ko‘rgazma-yarmarkasi tashkil etildi.
Tadbirning asosiy maqsadi qishloq xo‘jaligida qo‘llanilayotgan zamonaviy texnika va texnologiyalarni keng jamoatchilikka namoyish etish, fermer va klaster xo‘jaliklarini ilg‘or texnika vositalari hamda zamonaviy texnik yechimlar bilan yaqindan tanishtirish, shuningdek, ta’lim muassasalari, ishlab chiqaruvchilar, yetkazib beruvchilar va amaliyotchi mutaxassislar o‘rtasidagi hamkorlikni yanada rivojlantirishdan iborat bo‘ldi.
Ko‘rgazmada turli quvvat va vazifalarga mo‘ljallangan zamonaviy traktorlar, g‘alla o‘rish kombaynlari, ekish mashinalari, tuproqqa ishlov berish agregatlari, transport vositalari hamda boshqa qishloq xo‘jaligi texnikalari namoyish etildi. Jumladan, LOVOL rusumli traktorlar, zamonaviy ekish agregatlari va yirik quvvatli texnikalar ishtirokchilarda katta qiziqish uyg‘otdi.
Ayniqsa, tadbir Andijon qishloq xo‘jaligi va agrotexnologiyalar instituti talabalari uchun katta amaliy ahamiyat kasb etdi. Institutning agroinjeneriya, qishloq xo‘jaligini mexanizatsiyalashtirish, texnik servis va turdosh ta’lim yo‘nalishlarida tahsil olayotgan talabalar zamonaviy texnika vositalari bilan yaqindan tanishish, ularning asosiy mexanizmlari va ishlash tamoyillarini o‘rganish, ishlab chiqaruvchi hamda soha mutaxassislari bilan bevosita muloqot qilish imkoniyatiga ega bo‘ldilar.
Ko‘rgazma davomida qishloq xo‘jaligi korxonalari, fermer xo‘jaliklari, klaster korxonalari, texnika vositalarini yetkazib beruvchi tashkilotlar vakillari o‘zaro hamkorlikni yanada mustahkamlash, zamonaviy texnikalarni amaliyotga joriy etish va soha uchun malakali mutaxassislar tayyorlash masalalari yuzasidan fikr almashdilar.
Mazkur ko‘rgazma zamonaviy qishloq xo‘jaligi ishlab chiqarishini mexanizatsiyalashtirish darajasini oshirish, resurs tejamkor va yuqori unumli texnikalarni amaliyotga joriy etish, mehnat unumdorligini oshirish hamda mahsulot tannarxini kamaytirishga xizmat qildi. Shuningdek, tadbir ta’lim – ilm-fan – ishlab chiqarish integratsiyasini yanada mustahkamlash uchun muhim amaliy maydon bo‘ldi.