Andijonda viloyat OITSga qarshi kurash markazining zamonaviy binosi foydalanishga topshirildi
2026-09-18 00:00:00 / Yangiliklar
Andijon viloyatida aholi salomatligini muhofaza qilish, xususan, OIV infeksiyasining oldini olish, uni barvaqt aniqlash hamda bemorlarga yuqori sifatli tibbiy xizmat ko‘rsatish tizimini takomillashtirish borasida izchil islohotlar amalga oshirilmoqda. Viloyat OITSga qarshi kurash markazining kapital ta’mirlanib, butunlay zamonaviy qiyofaga keltirilgan bosh binosining tantanali ravishda foydalanishga topshirilishi ushbu yo‘nalishdagi ishlarning amaliy ifodasi bo‘ldi.
Tashkil etilgan rasmiy ochilish marosimida viloyat sog‘liqni saqlash boshqarmasi mutasaddilari, soha faxriylari, tibbiyot xodimlari hamda keng jamoatchilik vakillari ishtirok etdilar. Tadbirda mamlakatimizda ixtisoslashtirilgan tibbiyot muassasalarining moddiy-texnik bazasini mustahkamlash, ularni ilg‘or uskunalar bilan jihozlash va aholiga ko‘rsatilayotgan tibbiy yordam sifatini xalqaro standartlar darajasiga ko‘tarishga alohida e’tibor qaratilayotgani ta’kidlandi.
Mazkur obyektda qurilish-ta’mirlash ishlari Osiyo taraqqiyot bankining investitsiyalari hisobidan ajratilgan 12 milliard so‘mdan ortiq mablag‘ evaziga “Bunyodkor Muboshir” mas’uliyati cheklangan jamiyati binokorlari tomonidan yuqori sifat bilan bajarildi.
Yangi majmuada tibbiyot xodimlarining samarali faoliyat yuritishi hamda bemorlarga ixtisoslashtirilgan statsionar va ambulator yordam ko‘rsatish uchun barcha zarur sharoitlar yaratilgan. Xususan, markaz laboratoriyalari eng so‘nggi rusumdagi yuqori texnologik uskunalar bilan jihozlangan bo‘lib, bu yerda 20 dan ortiq turdagi murakkab laboratoriya tahlillari va diagnostika tekshiruvlarini o‘tkazish imkoniyati mavjud. Bu esa kasallikni erta bosqichlarda aniqlash samaradorligini keskin oshiradi.
Bugungi kunda mazkur zamonaviy tibbiyot muassasasida aholiga malakali yordam ko‘rsatish uchun 30 nafar tor soha shifokorlari hamda 72 nafar o‘rta tibbiyot xodimlari faoliyat olib bormoqda. Ilg‘or diagnostika usullari tatbiq etilgan ushbu maskan viloyatda OIV infeksiyasi tarqalishining oldini olish va profilaktika tadbirlari sifatini yangi bosqichga olib chiqishga xizmat qiladi.