Andijon vilоyati hоkimligi

Bugun soat 09:20 da Toshkent markaziy temir yo‘l vokzalidan yo‘lga chiqqan 730-sonli yangi avlod elektropoyezdi “Toshkent – Andijon” yo‘nalishidagi ilk qatnovini muvaffaqiyatli amalga oshirdi. Zamonaviy elektropoyezd Angren, Pop, Qo‘qon va Marg‘ilon bekatlarida to‘xtab, yuqori tezlikda harakatlangan holda soat 13:35 da Andijon shahridagi temir yo‘l vokzaliga yetib keldi.

Yangi elektropoyezdning Andijonga kirib kelishi vokzal perronida katta tantana bilan kutib olindi. Unda jamoatchilik vakillari, mehnat faxriylari, nuroniylar, yoshlar hamda soha mutaxassislari ishtirok etib, ushbu muhim voqeaga yuksak ko‘tarinkilik bilan guvoh bo‘ldilar.

Innovatsion texnologiyalar asosida ishlab chiqilgan mazkur elektropoyezd 4 ta zamonaviy va shinam vagondan tashkil topgan bo‘lib, bir vaqtning o‘zida 357 nafar yo‘lovchiga xizmat ko‘rsatish imkoniyatiga ega. Poyezdda yo‘lovchilar uchun qulay va xavfsiz safarni ta’minlashga qaratilgan zamonaviy yechimlar mujassam etilgan.

Alohida ta’kidlash joizki, ilgari Toshkent va Andijon o‘rtasidagi temir yo‘l qatnovlari 6–7 soatgacha davom etgan bo‘lsa, yangi elektropoyezd orqali ushbu masofani atigi 4 soat 15 daqiqada bosib o‘tish imkoniyati yaratildi. Bu esa yo‘lovchilar uchun vaqt tejalishi, safar qulayligi va xizmat ko‘rsatish sifati jihatidan muhim yangilik hisoblanadi.

“Toshkent – Andijon – Toshkent” yo‘nalishida zamonaviy tezyurar elektropoyezd qatnovining yo‘lga qo‘yilishi poytaxt va Andijon viloyati o‘rtasidagi transport-logistika aloqalarini yanada mustahkamlash, yo‘lovchi tashish xizmatlari sifatini yangi bosqichga olib chiqish hamda hududlar o‘rtasidagi iqtisodiy, ijtimoiy va madaniy aloqalarni rivojlantirishga xizmat qiladi.

Shuningdek, mazkur yangi transport yo‘nalishi Andijon viloyatining turizm salohiyatini yanada oshirish, ichki va xorijiy sayyohlar uchun hududga tashrif buyurish imkoniyatlarini kengaytirish hamda zamonaviy, xavfsiz va qulay transport infratuzilmasini rivojlantirishda muhim omil bo‘lib xizmat qiladi.