Aziz o‘quvchilar, hurmatli ustoz va murabbiylar!

Sizlarni yangi 2026–2027 o‘quv yilining boshlanishi bilan chin qalbimdan samimiy muborakbod etaman!

Yangi o‘quv yili — yangi maqsadlar, ezgu orzular va ulkan marralar sari dadil qadam tashlanadigan, bilim va ko‘nikmalarni boyitish, o‘z ustida izlanish va yangi yutuqlarga intilish davridir.

Bugun Andijon viloyatining barcha umumiy o‘rta ta’lim maktablari va ta’lim muassasalarida yangi o‘quv yilini munosib kutib olish uchun zarur shart-sharoitlar yaratildi. Joriy o‘quv yili oldidan viloyatimizdagi 98 ta maktabda qurilish-ta’mirlash va rekonstruksiya ishlari amalga oshirildi.

Xususan, Investitsiya dasturi doirasida 22 ta maktabda qurilish-ta’mirlash va obodonlashtirish ishlari bajarilib, ushbu ta’lim maskanlarining qiyofasi tubdan yangilandi. Bu sa’y-harakatlarning barchasi o‘quvchilar uchun yanada qulay, zamonaviy va munosib ta’lim muhitini yaratishga qaratilgan.

Eng muhimi, yangi o‘quv yilida viloyatimiz maktablarida ta’lim olayotgan 650 ming nafarga yaqin o‘quvchiga sifatli ta’lim-tarbiya berish uchun zarur barcha shart-sharoitlar yaratildi.

Hurmatli ustozlar!

Sizlarning fidokorona mehnatingiz, yuksak mas’uliyatingiz va yosh avlodga berayotgan bilimingiz mamlakatimizning buguni va ertangi kuni uchun beqiyos ahamiyatga ega.

Har bir o‘quvchining qalbiga ilmga muhabbat, Vatanga sadoqat, ezgulik va bunyodkorlik tuyg‘ularini singdirishdek sharafli va mas’uliyatli vazifani sidqidildan ado etayotgan barcha pedagoglarga chuqur minnatdorlik bildiraman.

Sizlarga mustahkam sog‘lik, oilaviy xotirjamlik, kasbiy faoliyatingizda ulkan muvaffaqiyatlar va yangi zafarlar tilayman.

Aziz o‘quvchilar!

Sizlar — yurtimizning ertangi kuni, xalqimizning katta umidi va Yangi O‘zbekiston taraqqiyotining asosiy bunyodkor kuchisiz.

Shu bois bilim olishga, zamonaviy kasb-hunarlarni egallashga, xorijiy tillarni puxta o‘rganishga, ilm-fan va innovatsiyalar sirlarini o‘zlashtirishga intiling. Vaqtdan unumli foydalanib, oldingizga katta va aniq maqsadlar qo‘ying.

Ishonchim komilki, Andijonning bilimga chanqoq, iste’dodli va vatanparvar yoshlari kelgusida o‘zining yuksak natijalari bilan ota-onalari, ustozlari va ona Vatanimiz faxriga aylanadi.

Yangi o‘quv yili barchangizga yangi bilim va imkoniyatlar, ulkan yutuqlar hamda yorqin kelajak sari dadil qadamlar olib kelsin!

Har bir maktabda ta’lim sifati yuksalsin, ustozlarning mehnati doimo qadrlansin, o‘quvchilarimizning ezgu orzu va maqsadlari ro‘yobga chiqsin!

Barchangizga mustahkam sog‘lik, oilaviy farovonlik, kuch-g‘ayrat va yangi o‘quv yilida ulkan muvaffaqiyatlar tilayman.

Yangi o‘quv yili muborak bo‘lsin!

Shuhratbek ABDURAHMONOV,
Andijon viloyati hokimi