Jumladan, Andijon shahridagi 13-sonli umumiy o‘rta ta’lim maktabida yangi o‘quv yilining boshlanishi munosabati bilan bayram tadbiri bo‘lib o‘tdi. Unda viloyat hokimi Shuhratbek Abdurahmonov ishtirok etib, maktab jamoasi, o‘quvchilar, ota-onalar hamda mahalla faollarini yangi o‘quv yili va yaqinda keng nishonlangan O‘zbekiston Respublikasi davlat mustaqilligi bayrami bilan samimiy muborakbod etdi.

Tadbirda mamlakatimizda so‘nggi yillarda yosh avlodga sifatli ta’lim va munosib tarbiya berishga qaratilayotgan yuksak e’tibor, ta’lim tizimida amalga oshirilayotgan keng ko‘lamli islohotlar hamda o‘quvchilar uchun yaratilayotgan zamonaviy sharoit va imkoniyatlar alohida ta’kidlandi.

Shuningdek, yoshlarni Vatanga muhabbat va sadoqat, milliy va umuminsoniy qadriyatlarga hurmat ruhida tarbiyalash, ularning bilim olishga bo‘lgan qiziqishini oshirish, intellektual salohiyatini ro‘yobga chiqarish hamda kelajakda mamlakat taraqqiyotiga munosib hissa qo‘shadigan barkamol avlodni voyaga yetkazish muhim vazifalardan ekani qayd etildi.

Tantanali tadbir doirasida yangi o‘quv yilida ilk bor maktab ostonasidan hatlab o‘tayotgan 1-sinf o‘quvchilariga O‘zbekiston Respublikasi Prezidenti sovg‘alari tantanali ravishda topshirildi.

Yangi o‘quv yili munosabati bilan viloyatning barcha ta’lim muassasalarida o‘tkazilgan “Mustaqillik va kelajak soatlari” mashg‘ulotlarida ham o‘quvchilarga mamlakatimiz mustaqilligining tarixiy ahamiyati, bugungi taraqqiyot yo‘li va yoshlar oldidagi ulkan imkoniyatlar haqida tushunchalar berildi.

2026–2027-o‘quv yilining boshlanishi Andijon viloyatidagi ta’lim muassasalarida ko‘tarinki kayfiyat, ezgu maqsadlar va yangi marralarga intilish ruhida kutib olindi.