Jalaquduq tumanida zamonaviy polikarbonat mahsulotlari ishlab chiqaruvchi yangi korxona ishga tushirildi
2026-08-24 13:20:00 / Yangiliklar
Xitoyning “Huazhang International” kompaniyasi tomonidan zamonaviy polikarbonat mahsulotlarini ishlab chiqarishga ixtisoslashgan yangi korxona faoliyati yo‘lga qo‘yildi.
Umumiy qiymati 3 million AQSh dollarini tashkil etuvchi mazkur investitsiyaviy loyiha doirasida 50 ta yangi ish o‘rni yaratildi.
Yangi ishlab chiqarish majmuasida zamonaviy texnologiyalar asosida ichki va tashqi bozorlarda talab yuqori bo‘lgan polikarbonat mahsulotlari ishlab chiqariladi.
Korxona faoliyatining ilk kunlaridanoq ishlab chiqarilayotgan mahsulotlarga bo‘lgan talab yuqori ekani namoyon bo‘ldi. Xususan, tayyor mahsulotlarni yetkazib berish bo‘yicha qo‘shni davlatlar vakillari bilan dastlabki shartnomalar imzolandi.
Bu esa korxonada ishlab chiqarilayotgan mahsulotlarning nafaqat ichki bozorda, balki tashqi bozorlarda ham raqobatbardosh va talab yuqori ekanidan dalolat beradi.
Korxonaning ustuvor yo‘nalishlaridan biri eksport salohiyatini oshirishdan iborat. Kelgusida ishlab chiqarish quvvatlarini kengaytirish hamda mahsulotlarni xorijiy davlatlarga eksport qilish hajmini yanada oshirish rejalashtirilgan.
Ta’kidlash joizki, bunday investitsiyaviy loyihalarning amalga oshirilishi hududning sanoat salohiyatini yuksaltirish, yangi ish o‘rinlarini yaratish, aholi bandligi va daromadlarini oshirish, shuningdek, eksportbop mahsulotlar ishlab chiqarish hajmini kengaytirishga xizmat qiladi.
Yangi korxonaning ishga tushirilishi Jalaquduq tumanida sanoat ishlab chiqarishini rivojlantirish, xorijiy investitsiyalarni jalb etish va eksport salohiyatini oshirish yo‘lidagi yana bir muhim qadam bo‘ldi.