Andijon Olimpiya va paralimpiya sport turlariga tayyorlash markazida tashkil etilgan bellashuvlar qizg‘in va murosasiz kurashlarga boy bo‘ldi.

Musobaqalarda viloyatning tuman va shahar bosqichlarida g‘oliblikni qo‘lga kiritgan 16–21, 22–26 hamda 27–30 yosh toifalaridagi o‘g‘il-qizlar jamoalari ishtirok etdi.

Dastur doirasida o‘g‘il bolalar 100, 200 va 400 metr masofalarga yugurish, uzunlikka sakrash yo‘nalishlarida, qizlar esa 60, 100 va 200 metr masofalarga yugurish hamda uzunlikka sakrash bo‘yicha o‘z mahoratlarini namoyish etdi.

Musobaqa yakunlariga ko‘ra, eng yuqori natijalarni qayd etgan ishtirokchilar g‘olib deb topilib, “Besh tashabbus olimpiadasi”ning respublika bosqichida ishtirok etish huquqini qo‘lga kiritdi.

G‘olib va sovrindorlar tashkilotchilar tomonidan diplom, medallar hamda Sport vazirligining sport kiyimlari jamlanmalari bilan taqdirlandi.

Mazkur musobaqalar yoshlar o‘rtasida sog‘lom turmush tarzini targ‘ib qilish, sportga bo‘lgan qiziqishni oshirish hamda iqtidorli sportchilarni aniqlashda muhim ahamiyat kasb etmoqda.