Mazkur parvoz 4-avgust kuni mahalliy vaqt bilan soat 03:13 da Belgiyaning Liej xalqaro aeroportidan amalga oshirilib, Andijonga umumiy og‘irligi 83,3 tonnani tashkil etuvchi 160 bosh nasldor tirik qoramol yetkazib kelindi.

Havo kemasida Germaniyaning yuqori mahsuldorlik xususiyatlariga ega Simmental va Golshtein zotlariga mansub nasldor qoramollar olib kelindi. Ushbu zotlar chorvachilikda o‘zining yuqori samaradorligi bilan ajralib turadi. Xususan, Simmental zoti sut va go‘sht yo‘nalishidagi universalligi bilan mashhur bo‘lsa, Golshtein zoti dunyodagi eng yuqori sut mahsuldorligiga ega qoramol zotlaridan biri hisoblanadi.

Tirik hayvonlarni qabul qilish jarayonida barcha veterinariya va biologik xavfsizlik talablari qat’iy ta’minlandi. Qoramollarni havo kemasidan tushirish, veterinariya ko‘rigidan o‘tkazish hamda maxsus transport vositalariga yuklash ishlari tezkor va xavfsiz tarzda amalga oshirildi.

Mazkur jarayonda “Uzbekistan Airports” AJ hamda Andijon xalqaro aeroporti mutaxassislari tomonidan yuklarni qabul qilish va qayta ishlash ishlari xalqaro standartlar asosida tashkil etildi. Natijada tirik hayvonlarning xavfsiz tushirilishi va belgilangan manzilga yetkazilishi muvaffaqiyatli ta’minlandi.

Boeing 747-400F yuk havo kemasining qabul qilinishi Andijon xalqaro aeroportining yirik hajmdagi va maxsus toifadagi yuklarni, jumladan tirik hayvonlarni ham xalqaro talablarga muvofiq qabul qilish hamda ularga sifatli xizmat ko‘rsatish borasidagi imkoniyatlari kengayib borayotganini ko‘rsatadi.

Mazkur voqea hududning logistika salohiyatini oshirish, xalqaro yuk tashuvlarini rivojlantirish va Andijon aeroportining mintaqaviy transport markazi sifatidagi o‘rnini mustahkamlashda muhim ahamiyat kasb etadi.