Festival turkiy xalqlar o‘rtasidagi do‘stlik va qardoshlik rishtalarini yanada mustahkamlash, mushtarak tarixiy-madaniy merosni asrab-avaylash hamda uni xalqaro miqyosda keng targ‘ib etishga xizmat qilmoqda.

Mazkur nufuzli xalqaro festivalda mamlakatimiz nomidan Andijon viloyati ijodiy jamoasi ishtirok etdi. Bu bejiz emas. Zero, Andijon shahri 2026-yilda Turkiy dunyoning madaniyat poytaxti deb e’lon qilingan bo‘lib, festival doirasidagi chiqishlar ayni paytda bo‘lajak madaniyat poytaxtining xalqaro taqdimotiga aylandi.

Ijodiy jamoa tarkibidan O‘zbekiston davlat filarmoniyasi Andijon viloyati bo‘limi xonandalari, raqqos va raqqosalar, Andijon viloyati musiqali drama teatri aktyorlari hamda hududdagi qator ta’lim muassasalari vakillari o‘rin oldi. Ular tomonidan ijro etilgan milliy kuy-qo‘shiqlar, jozibador raqslar va sahna chiqishlari festival ishtirokchilari hamda mehmonlari tomonidan katta qiziqish va olqishlar bilan kutib olindi.

Karaman shahridagi tadbirlardan so‘ng Andijon viloyati ijodiy jamoasi Turkiya poytaxti Anqaraga yo‘l oldi. Ular bu yerda TURKSOY hamda Kechiyoren tumani hokimligi hamkorligida o‘tkazilayotgan III Xalqaro turkiy dunyo festivalida ham O‘zbekistonning boy madaniy merosi va Andijon vohasining betakror san’atini namoyish etadi. Mazkur festival 8-avgustga qadar davom etadi.

Andijon viloyati ijodiy jamoasining xalqaro festivallardagi ishtiroki mamlakatimiz madaniy diplomatiyasini rivojlantirish, milliy san’atimizni xalqaro maydonda keng targ‘ib etish hamda "Andijon – 2026 yil Turkiy dunyoning madaniyat poytaxti" loyihasining xalqaro nufuzini yanada mustahkamlashga xizmat qilmoqda.