Andijonda xalqaro hamkorlik asosida Xotin-qizlar tadbirkorlik markazi faoliyati yo‘lga qo‘yildi
2026-06-16 14:10:00 / Yangiliklar
Andijon shahrida “Tadbirkor ayol” xalqaro ishbilarmon ayollar uyushmasi hamda Germaniyaning “German Sparkassenstiftung” kompaniyasi hamkorligida xotin-qizlar Tadbirkorlik markazi o‘z faoliyatini boshladi.
Markazning ochilish marosimida xorijlik hamkorlar, uyushma vakillari va tadbirkorlik istagidagi xotin-qizlar ishtirok etdi. Tadbir doirasida milliy hunarmandchilik mahsulotlari ko‘rgazmasi ham tashkil etildi.
Germaniya kompaniyasi tomonidan zamonaviy texnik uskunalar bilan jihozlangan ushbu maskanda xotin-qizlar tadbirkorlik, IT, tikuvchilik, qandolatchilik, issiqxona va mehmonxona xo‘jaligini boshqarish kabi yo‘nalishlarda bepul o‘qitiladi.
“Tadbirkor ayol” uyushmasining malakali trenerlari tomonidan olib boriladigan kurslar yakunida bitiruvchilarga maxsus sertifikat beriladi. Ushbu hujjat asosida ular imtiyozli kreditlar olish uchun banklarga yo‘naltiriladi.
Markaz mutaxassislari xotin-qizlarning biznes faoliyatini yo‘lga qo‘yishlari uchun kelgusida ham yaqindan ko‘mak berib, ularni doimiy monitoring qilib boradi.
Ushbu loyiha mamlakatimizda ayollarni ijtimoiy qo‘llab-quvvatlash, ularni kasb-hunarga o‘rgatish orqali bandligini ta’minlash va oilalar farovonligini oshirishga xizmat qiladi.