O‘zbekiston Respublikasi Prezidentining 2021 yil 10 fevraldagi «Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida»gi PF-6166-son Farmoni, 2021 yil 31 maydagi «Ijro.gov.uz» ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida”gi PQ-5132-sonli qarori hamda 2025 yil 25 iyuldagi «Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida»gi PF-117-sonli Farmonida belgilangan topshiriqlar asosida Andijon viloyati hokimligida «Ijro.gov.uz» ijro intizomi idoralararo elektron tizimi orqali O‘zbekiston Respublikasi Prezidentining Farmon, qaror, farmoyish va topshiriqlari hamda majlis bayonlarida berilgan topshiriqlari o‘z vaqtida ijroga qaratilib, sifatli bajarilishi qat’iy nazoratga olingan.

Haftaning har dushanba kuni viloyat hokimi rahbarligida, haftaning juma kunlari hokimning birinchi o‘rinbosari huzurida ijro intizomi holati tanqidiy muhokama qilib kelinmoqda. O‘zbekiston Respublikasi Prezidentining hujjatlari va topshiriqlari ijrosi kunbay qat’iy nazorat qilinmoqda.
«Ijro.gov.uz» ijro intizomi idoralararo elektron tizimiga kiritilgan qonunchilik hujjatlari va topshiriqlar Adliya vazirligi, Vazirlar Mahkamasi hamda Hisob palatasi tomonidan ekspertizadan o‘tkazilganidan so‘ng nazoratdan yechilishi belgilanganligini inobatga olgan holda, viloyat hokimligi apparatida ushbu topshiriqlar belgilangan muddatlarda va puxta bajarilishini ta’minlash maqsadida oldindan ogohlantirish tizimi yo‘lga qo‘yilgan.

Ya’ni, joriy yil aprel oyida muddati keladigan topshiriqlarning sifatli bajarilishi, shuningdek, bajarilmaslik xavfi mavjud topshiriqlarni bajarish choralarini ko‘rish maqsadida har hafta 2 marotaba kelgusi oy hamda joriy yilning birinchi yarim yil yakuniga qadar ijro muddati keladigan topshiriqlar ro‘yxati eslatma sifatida hokimning o‘rinbosarlari, maslahatchilari, bo‘linma rahbarlariga hamda tuman va shahar hokimliklariga yetkazilmoqda. Hokimlik apparatida qonunchilik hujjatlari va topshiriqlari ijrosi haqidagi ma’lumotlarni ijro muddati yakunlanishini kutmasdan elektron dasturga oldindan kiritib borish masalasiga alohida e’tibor qaratilmoqda.

Viloyat hokimligi apparati mas’ul xodimlari tomonidan har oyda tasdiqlangan grafik asosida tuman, shahar hamda viloyat boshqarmalar, korxona va tashkilotlarida qonunchilik hujjatlari va topshiriqlari ijrosi maqsadli o‘rganilmoqda. Jumladan, joriy yilning yanvar-mart oylarida 3 ta (Andijon, Baliqchi tumanlari va Andijon shahri) tuman, shahar hokimliklarida qonunchilik hujjatlari va topshiriqlari ijrosi holati o‘rganilib, topshiriqlar ijrosini tashkil etishda amaliy yordam ko‘rsatilgan.
2026 yilning 1-choragi davomida viloyat hokimligi apparati va tegishli boshqarma tashkilot rahbarlari ishtirokida ijro intizomining holati 9 marotaba muhokama qilingan.

2023 yil 21 noyabr kuni Prezidentimiz rahbarliklarida kengaytirilgan tarzda o‘tkazilgan videoselektor yig‘ilishida ijro intizomini mustahkamlash bo‘yicha berilgan topshiriqlardan kelib chiqib, har bir topshiriqqa «temir intizom» bilan jiddiy yondashib, O‘zbekiston Respublikasi Prezidenti va Hukumatning topshiriqlarini o‘z vaqtida, samarali hamda to‘liq bajarishda viloyat hokimining o‘rinbosarlari, viloyat korxona tashkilotlar rahbarlari, tuman va shaharlar hokimlarining roli hamda shaxsiy javobgarligini oshirish choralari ko‘rilib, sustkashlikka yo‘l qo‘ygan mas’ul rahbarlarga nisbatan intizomiy jazo choralari ko‘rib borilmoqda.

«Ijro.gov.uz» ijro intizomi idoralararo yagona elektron tizimi orqali bugungi kunga qadar Andijon viloyatiga jami 1 707 ta hujjatlar kelib tushgan bo‘lib, ushbu hujjatlar orqali 15 925 ta topshiriqlar (2 ta qonunda 6 ta, 308 ta Farmonlarda 3 102 ta, 914 ta qarorlarda 8 013 ta, 36 ta farmoyishlarda 308 ta, 447 ta bayonlarda 4 496 ta) ijroga qaratilgan. Shundan, 13 559 tasi bajarilgan, 2 366 tasi topshiriq ijrosi davom etmoqda. 

2026 yilning o‘tgan davri davomida «Ijro.gov.uz» ijro intizomi idoralararo yagona elektron tizimi orqali viloyatga daxldor 485 ta topshiriq kelib tushgan (2025 yilga nisbatan 68taga yoki 14,0% ga oshgan). Mazkur topshiriqlarga viloyat hokimligi asosiy va hamijrochi sifatida belgilangan. Ushbu topshiriqlarning ijrosi ta’minlanib, nazoratdan yechilgan.
Joriy yilning mart oyida «Ijro.gov.uz» ijro intizomi idoralararo yagona elektron tizimida Prezidentimizning viloyat hokimligiga daxldor 220 ta topshiriqlar kelib tushgan bo‘lib, barchasining ijrosi ta’minlandi. Shuningdek, ijro intizomi idoralararo yagona elektron tizimining Administratsiya topshiriqlari modulida viloyat hokimligiga daxldor 25 ta,  Vazirlar Mahkamasi topshiriqlari modulida 29 ta topshirig‘i kelib tushgan bo‘lib, ularning barchasining ijrosi ta’minlandi.  

2026 yilning aprel oyida Prezidentmizning viloyatga daxldor 174 ta, Administratsiya rahbari topshiriqlarining 22 ta hamda Vazirlar Mahkamasining 20 ta topshiriqlarining ijro muddati belgilangan bo‘lib, ushbu topshiriqlar ijrosini ta’minlash bo‘yicha kunbay kalendar grafik ishlab chiqildi.
Viloyat hokimi rahbarligida 2026 yilning 30martda o‘tkazilgan yig‘ilishda muhokama qilinib, har bir hokim o‘rinbosarlari kesimida «Yo‘l xarita»lari ishlab chiqilgan va tasdiqlandi hamda ijroga qaratilgan. Aprel oyida O‘zbekiston Respublikasi Prezidentining 179 ta topshiriqlaridan 38 tasi va Administratsiya rahbari 22 ta topshiriqlaridan 5 ta hamda Hukumat hujjatlarida berilgan 20 ta topshiriqlarining 4 tasining ijrosi ta’minlandi hamda qolgan topshiriqlar ijrosini belgilangan muddatlarda va sifatli ta’minlash bo‘yicha barcha zaruriy chora-tadbirlar ko‘rilmoqda.
 
O‘zbekiston Respublikasi Prezidentining 2021 yil 10 fevral kungi PF-6166-son Farmoni ijrosini ta’minlash hamda tizimli nazorat qilib borish maqsadida «Mahalliy davlat hokimiyati to‘g‘risida»gi Qonunning 6 va 24-moddalariga asosan Xalq deputatlari viloyat Kengashi
QAROR QILADI:
1. Viloyat hokimi Sh.Abaduraxmanaovning Andijon viloyatida qonunchilik hujjatlarining ijrosini samarali tashkil etish bo‘yicha amalga oshirilayotgan chora-tadbirlar yuzasidan hisoboti ma’lumot uchun qabul qilinsin.
2. Qonunchilik hujjatlarida berilgan topshiriqlar ijrosini o‘z muddatida bajarilishida shaxsiy nazoratni yetarli darajada tashkil etmaganligi va bu borada kamchiliklarga yo‘l qo‘yilayotganligi uchun viloyat hokimining barcha o‘rinbosarlari qat’iy ogohlantirilsin.
3. Viloyat hokimining barcha o‘rinbosarlari, viloyat tashkilotlari rahbarlari hamda shaharlar va tumanlar hokimlariga:
O‘zbekiston Respublikasi Prezidentining hujjatlarida berilayotgan topshiriqlar ijrosini o‘z vaqtida bajarishga jiddiy e’tibor qaratish; ijro intizomini ta’minlashda birinchi darajali rahbarlarning shaxsiy mas’uliyatini va javobgarligini yanada kuchaytirish; qonunchilik hujjatlarida berilgan topshiriqlarni ijrosi to‘g‘risidagi ma’lumotlarni tasdiqlovchi axborotni ilova qilgan holda belgilangan muddatlarda to‘liq va o‘z vaqtida «Ijro.gov.uz» elektron tizimiga sifatli qilib kiritib borish vazifalari topshirilsin.
4. Viloyat hokimligi ijro intizomi nazorati bo‘limi boshlig‘i B.Mamayusupovga:
O‘zbekiston Respublikasi Prezidentining 2021 yil 10 fevraldagi
PF-6166-sonli Farmoni hamda 2021 yil 31 maydagi PQ-5132-son qarori va 2025 yil 25 iyuldagi PF-117-son Farmoni talablari asosiy «Ijro.gov.uz» tizimi orqali kelib tushayotgan qonunchilik hujjatlari ijrosi borasida mas’ul rahbarlar ishtirokida Xalq deputatlari viloyat Kengashining sessiyalarida muhokama qilib borish; «Ijro.gov.uz» elektron tizimi orqali Andijon viloyati hokimligiga yuborilgan topshiriqlar ijrosi bo‘yicha tizimli nazoratni amalga oshirish; har oy yakuni bilan qonunchilik hujjatlari va topshiriqlarining ijro holati bo‘yicha axborot, shuningdek, topshiriqlarni to‘liq bajarmagan, kechiktirib bajargan yoki umuman ijrosini ta’minlamagan rahbar va mas’ul xodimlarga nisbatan intizomiy javobgarlik masalasini ko‘rib chiqish yuzasidan takliflar kiritib borish; joriy yil aprel oyida ijro muddati kelayotgan qonunchilik hujjatlaridagi topshiriqlarni barvaqt ijrosini ta’minlash maqsadida kalendar reja-grafikni ishlab chiqish va undagi har bir topshiriq ijrosi yuzasidan aniq mexanizmlarni belgilasin hamda shu asosida kunlik ish tashkil etilishini qat’iy nazoratga olish vazifalari topshirilsin.
5. Xalq deputatlari viloyat Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi (M.G‘aniyeva)ga:
O‘zbekiston Respublikasi Prezidentining 2021 yil 10 fevraldagi
PF-6166-sonli Farmoni hamda 2021 yil 31 maydagi PQ-5132-son qarori va 2025 yil 25 iyuldagi PF-117-son Farmoni talablari asosida qonunchilik hujjatlari ijrosini ta’minlanishi yuzasidan sessiya kun tartibiga doimiy masala sifatida kiritilishini va yig‘ilishlarda tanqidiy muhokama etib borish vazifasi yuklatilsin.
6. Ushbu qarorning bajarilishini nazorat qilish xalq deputatlari viloyat Kengashning Korrupsiyaga qarshi kurashish va xavfsizlik masalalari bo‘yicha doimiy komissiyasi (M.G‘aniyeva) hamda ijrosini ta’minlash viloyat hokimining barcha o‘rinbosarlari, kotibiyatlari va guruhlari zimmasiga yuklatilsin.