Prezident maktabi xalqaro imtihonlar markazi sertifikatini oldi
2026-01-09 09:55:00 / Yangiliklar
Jumladan, Andijon shahridagi Prezident maktabida ham yuqoridagi yo‘nalishlarda e’tiborga molik ishlar olib borilmoqda.
– Ayni kunda maktabimizda 168 nafar o‘quvchi tahsil olmoqda, – deydi Andijon shahridagi Prezident maktabi direktori Sardorbek Risliqboyev. – O‘quv jarayonlari “STEAM” ta’lim dasturi asosida olib borilmoqda. Keyingi yillarda maktabimiz ta’lim sifati, xalqaro standartlarga mos boshqaruv tizimi hamda o‘quvchi va pedagoglar salohiyatini rivojlantirish borasida salmoqli natijalarga erishib kelmoqda.
Yakunlangan 2025-yil ham maktab uchun samarali yillardan biri bo‘ldi. Xususan, ortda qolgan yil xalqaro akkreditatsiyalar, nufuzli imtihon natijalari, xalqaro tanlov va olimpiadalardagi yutuqlar, shuningdek, pedagoglar faoliyatining e’tirof etilishi bilan yodda qoldi.
Darhaqiqat, Andijon shahridagi Prezident maktabi 2025-yil mart oyida CIS (Council of International Schools) xalqaro akkreditatsiyasidan muvaffaqiyatli o‘tdi. Akkreditatsiya jarayonlari maktabda tizimli tarzda tashkil etilib, barcha bosqichlar xalqaro mezonlar asosida amaliyotga joriy etildi. Mazkur akkreditatsiya maktabda ta’lim sifati, o‘quv dasturlari, boshqaruv, xavfsizlik, o‘quvchilar uchun yaratilgan sharoitlar hamda pedagogik muhit xalqaro standartlarga to‘liq mos ekanini tasdiqlaydi.
Shu bilan birga, maktab jamoasi o‘tgan yili Pearson xalqaro ta’lim tashkilotining xalqaro GCSE dasturi bo‘yicha imtihonlar markazi sertifikatini qo‘lga kiritdi. Bu esa o‘quvchilarga xalqaro tan olingan baholash tizimi asosida bilimlarini sinovdan o‘tkazish imkonini beradi.
Hozirgi kunda maktab Cognia xalqaro ta’lim tashkiloti akkreditatsiyasidan o‘tish jarayonida faol ishtirok etmoqda.
So‘nggi yillarda maktab bitiruvchilarining xorijiy oliy ta’lim muassasalariga 100 foizlik to‘liq grant asosida qabul qilinish ko‘rsatkichi izchil oshib bormoqda. Xususan, 2025-yilda bu ko‘rsatkich 6 nafarga yetdi. Maktab bitiruvchilari Koreya Respublikasidagi KAIST (QS reytingida 53-o‘rin) hamda Seul Milliy Universiteti (QS reytingida 38-o‘rin) kabi dunyoning nufuzli universitetlariga grant asosida qabul qilindi.
O‘tgan o‘quv yilida maktab o‘quvchisi Shirina To‘rayeva “Raqamli avlod qizlari” tanlovining respublika bosqichida g‘oliblikni qo‘lga kiritib, Amerika Qo‘shma Shtatlariga ta’lim sayohatida ishtirok etdi.
Shuningdek, bir guruh o‘quvchilari Turkiyaning Istanbul shahrida joylashgan Fatih Sultan Mehmet o‘rta maktabida bo‘lib o‘tgan “Imkonsizlik to‘siqlarini yengish” mavzusidagi xalqaro konferensiyada qatnashdi. Dunyoning 45 ta davlat vakillari, 30 dan ortiq xalqaro maktablarning 200 dan ziyod delegatlari ishtirok etgan mazkur konferensiyada maktab o‘quvchisi Bexruzbek Xoldarov “Eng yaxshi delegat” nominatsiyasida g‘olib bo‘ldi.
Maktab bitiruvchilari xalqaro imtihonlarda ham yuqori natijalarni qo‘lga kiritdi. Bitiruvchilarning 100 foizi IELTS imtihonidan 6,5 va undan yuqori ballni qo‘lga kiritdi.
O‘quvchilarning 79 foizi SAT imtihonida 1200 ball va undan yuqori natija qayd etdi. Jumladan, maktabning 11-sinf o‘quvchisi Muxtorjon Mo‘ydinov SAT imtihonida eng yuqori – 1600 ballni qayd etib, nafaqat maktab, balki respublika miqyosidagi eng yuqori natijani qayd etdi.
Shuningdek, Cambridge A-Level imtihonlari natijalari ham yildan yilga o‘sib bormoqda. Xususan, yuqori baholar (A, B, C) ulushi 2023 yilda 58 foizni, 2024 yilda 68 foizni, 2025 yilda 84 foizni tashkil etdi.
O‘tgan yili maktab pedagoglari ham turli tanlovlar, respublika va xalqaro miqyosdagi anjumanlarda faol ishtirok etdi. Bundan tashqari, samarali mehnatlari uchun bir qator o‘qituvchilar turli nishon va mukofotlar bilan taqdirlanishdi. Xususan, Prezidentimiz farmoni bilan maktabning xorijlik mutaxassisi, kimyo fani o‘qituvchisi Marsden Abbey Nikole “Do‘stlik” ordeni bilan mukofotlandi.
Bir so‘z bilan aytganda, Andijon shahridagi Prezident maktabi jamoasi 2025-yilda erishilgan yutuqlari bilan respublika va xalqaro miqyosdagi yetakchi ta’lim muassasalaridan biri sifatida nufuzini yanada mustahkamladi.