Andijonda saylgoh – turizm ko‘chasi ish boshladi
2025-12-27 21:55:00 / Yangiliklar
Yangi yil bayrami arafasida Andijon shahridagi O‘rikzor mahallasi hududida andijonliklar va shahar mehmonlari uchun yana bir qulaylik yaratildi, 24/7 tartibda ishlaydigan saylgoh – gastronomik, turizm ko‘chasi barpo etilib, foydalanishga topshirildi.
Keng jamoatchilik vakillari ishtirokida saylgoh-turistik ko‘chaning ochilishiga bag‘ishlangan tadbirda so‘z olgan Andijon viloyati hokimi Shuhratbek Abdurahmonov yig‘ilganlarni yaqinlashib kelayotgan Yangi yil bayrami hamda zamonaviy ko‘chaning ish boshlashi bilan muborakbod etdi.
Umumiy qiymati 12 milliard so‘mga teng loyiha doirasida amalga oshirilgan ishlar natijasida ushbu ko‘chada 50 dan ziyod muzqaymoq, salqin ichimliklar va boshqa savdo do‘konlari, xizmat ko‘rsatish obyektlari tashkil etilib, 120 ta yangi ish o‘rni yaratildi.
Yangi barpo etilgan saylgoh-ko‘cha shahar aholisi va mehmonlarining ko‘ngilli dam olish imkoniyatini kengaytirish bilan birga, hududning obodligi va shaharsozlik qiyofasini yanada yaxshilashga xizmat qiladi.
– Zamonaviy, o‘ziga xos qiyofaga ega mazkur ko‘cha andijonliklar, ayniqsa, mahallamiz ahli uchun yangi yil tuhfasi bo‘ldi, – deydi Andijon shahridagi O‘rikzor mahallasida yashovchi Shoiraxon Ahmedova. – Farzand, nabiralarni yetaklab mana shunday obod, zamonaviy ko‘chada sayr qilish shubhasiz, har qanday kishining ko‘nglini ko‘taradi, faxrga to‘ldiradi. Kundan kunga obod bo‘layotgan yurtimizga aslo ko‘z tegmasin.